Gihugtan ang police visibility sa tibuok Dakbayan sa Mandaue samtang nangandam ang mga awtoridad sa pagdagsang sa mga tawo sa Semana Santa ug panahon sa bakasyon, dungan sa paghatag og gibug-aton sa kaluwasan sa publiko.
Matod ni Police Lieutenant Colonel Mercy Villaro-Kantuna sa Mandaue City Police Office (MCPO), nagsugod na ang pagpakatap sa kapulisan sa dili pa ang pormal nga pag-obserbar sa Semana Santa.
“Oo, nagsugod na kami sa pag-deploy sa among mga police officers, ilabi na karon nga nagsugod na ang Semana Santa, lakip na ang summer vacation period alang sa Philippine National Police,” matod ni Villaro-Kantuna.
Gipasabot niya nga dili mominos sa 10 ka mga simbahan sa siyudad ang gibutangan na og police assistance desks aron maseguro ang kaluwasan sa mga deboto.
Apan ang presensya sa kapulisan dili lang kutob sa mga simbahan.
“Dili lang sa mga simbahan kondili sa uban usab nga mga dapit nga kalingawan,” dugang niya.
Gipaabot sa mga awtoridad ang pagdagsang sa mga tawo sa mga mall, parke, ug mga liguanan tungod kay wala nay klase ug pahimuslan sa mga pamilya ang holiday break.
Matod ni Villaro-Kantuna, usa ka hagit alang kanila ang dungan nga pag-obserbar sa Semana Santa ug bakasyon tungod kay ang mga tawo magkatag sa mga relihiyusong dapit ug mga dapit-lingawanan.
Aron matubag kini, ang MCPO gipaubos na sa full alert status.
Tanang anaa nga mga personnel ang gipakatap aron mapadako ang police visibility ug mapugngan ang bisan unsang kriminalidad.
Bisan pa man kon duna’y pipila ka mga opisyal nga naka-leave o masakiton, ang mayoriya sa pwersa sa kapulisan anaa na sa kadalanan.
Ang mga police outposts magpabiling abli aron makahatag og dinaliang tabang.
Nanawagan ang mga opisyal sa mga residente nga magpabiling mabinantayon ug mokooperar sa mga awtoridad samtang nagpadayon ang hugot nga seguridad sa tibuok dakbayan. / ABC