Gipalambo pa sa kapulisan sa dakbayan sa Mandaue ang ilang serye sa awareness program batok sa krimen ning holiday season.
Ang Mandaue City Mobile Force Company (MCFMC) sa Mandaue City Police Office (MCPO) milusad og lecture sa mga personnel sa Development Bank of the Philippines (DBP) Mandaue Branch kon unsay ilang angayan nga buhaton kon makadawat og hulga sa pagpamomba.
Dili na bag-o ang maong matang sa pagpanghulga diin ang mga buhatan sa gobyerno, pribado nga kompanya lakip na ang mga tunghaan maoy kasagaran nga target sa mga kriminal.
Nangulo sa gilusad nga lecture ang commander mismo sa CMFC sa MCPO nga si Police Lieutenant Colonel Mark Gifter Sucalit niadtong Miyerkules, Disyembre 4, 2024 sa Barangay Alang-alang nga gitambungan sa mga staff sa bangko ug mga personnel sa Special Weapons and Tactics (SWAT) ug Explosive Ordnance Disposal.
Ang tumong niini aron masayod ang mga personnel lakip na ang ilang security officers, kon unsay angayan nga buhaton kon makadawat og hulga nga dunay bomba sa ilang edepisyo.
Dili lang sa hulga sa pagpamomba sila gibansay, lakip na niini ang hulga sa pagpanulis ilabi na nga sila ang kanunay nga target sa mga tulisan.
Gipakita ni Sucalit kon unsaon sa pag-ila kon ang nakasulod sa ilang buhatan dautang elemento na nga nagtinguha nga mohimo og pagpanulis.
Gitudloan usab sila og techniques unsaon pag-ila sa mga kadudahang tawo, dala niini lakip na ang gipangdala nga sakyanan.
Ning panahon sa holiday season, matod ni Sucalit, kinahanglan nga mabinantayon ang tanan dili lang ang kapulisan lakip na ang mga establisemento sanglit dili tanang lugar mabantayan sa kapulisan. / AYB