Nagpatabang ang Mandaue City Police Office (MCPO) sa kagamhanan sa siyudad nga mopalit og mga luna alang sa pagtukod og kaugalingong mga edipisyo sa Police Stations 3 ug 5, nga sa pagkakaron nag-operate sulod lang sa mga barangay hall sa Basak ug Opao.
Si MCPO City Director Police Colonel Cirilo Acosta ang nipadangat sa hangyo atol sa usa ka courtesy visit kang Mayor Thadeo “Jonkie” Ouano niadtong Lunes, Hulyo 14.
Gipasabot niya ang panginahanglan sa hustong pasilidad sa kapulisan ug ang pagsiguro sa luna maoy unang lakang.
Ang ilang hangyo nga tabangan sila sa siyudad nga makakitag luna nga labing menos 400 square meters nga makatukod ang Philippine National Police (PNP) og pasilidad alang sa Station 3 ug 5.
Gitataw niya nga ang kasamtangang luna gamay kaayo.
Ang Station 3 sa Barangay Basak ug Station 5 sa Barangay Opao nagpadayon sa pag-operate sulod sa mga luna sa barangay hall nga dili gyud orihinal nga gidisenyo alang sa operasyon sa kapulisan.
Ang Station 1 sa Barangay Centro dunay kaugalingong building, apan wa masubay sa standard nga gilatid sa National Police Commission (NAPOLCOM).
Matod ni Acosta nga ang mga police station nga nahimutang sulod sa pasilidad sa barangay gamay raa kaayo alang sa epektibong pagpatuman sa balaod.
Duna kini makeshift nga mga setup nga dili na haom alang sa hustong operasyon, ilabina kung magdumala og mga piniriso ug magproseso og mga rekord.
“It’s really cramped, especially since we regularly apprehend suspects on a daily or weekly basis, and it takes time before a commitment order is issued,” matod niya.
Giklaro ni Acosta nga kung makahatag na ang siyudad og angay nga luna, mas maayo kung pinaagi sa donasyon o usufruct, ang PNP makagahin na og pundo alang sa pagtukod sa mga istasyon.
Kini mosunod sa standard nga disenyo nga girekomendar sa NAPOLCOM, nga naglakip sa mga detention cell, administrative area, quarters sa mga personnel, ug mga transaction counter alang sa publiko.
Girekomendar sa NAPOLCOM ang pagbalhin kanila ngadto sa gidesinyo nga mga edipisyo aron mapalambo ang visibility sa kapulisan ug mapaayo ang paghatod sa serbisyo.
Naglaum ang MCPO nga maapil sa siyudad ang pagpalit og luna sa budget sa sunod tuig, sanglit wala kini nalakip sa appropriation karong tuiga.
Ang ubang mga istasyon sa kapulisan sa Mandaue City naglakip sa Station 2 sa Barangay Subangdaku, Station 4 sa Barangay Casuntingan, ug Station 6 sa Barangay Canduman.
Kini uban sa Station 1, 3, ug 5, nga sa pagkakaron nagtagbo sa ideal nga police-to-population ratio nga gitakda sa balaod apan magkalahi sa kalidad sa pasilidad ug availability sa luna.
Gitataw ni Acosta nga di pa kinahanglan nga magdugang og bag-ong estasyon sa kapulisan sa Mandaue sa pagkakaron.
Ang kasamtangang unom ka estasyon nakatuman na sa ideal nga “1-to-555 police-to-population ratio” nga gitakda sa Republic Act No. 6975.
Ang focus kinahanglan sa pag-upgrade sa mga pasilidad, dili sa pagpalapad sa gidaghanon sa mga istasyon.
Nihangyo usab si Acosta og mga LED television, communication equipment, ug uban pang importanteng device aron mapaayo ang operasyon sa command center sa MCPO ug mapalig-on ang ilang monitoring ug coordination capabilities. / CAV