Gihulagway nga dili makatarunganon ang padayong pagkolekta sa Metropolitan Cebu Water District (MCWD) og minimum charge sa mga konsumidor bisan pila ka semana o buwan nga walay agay ang ilang mga gripo.
Tungod niini, gisugyot ni Konsehal Harold Go ngadto sa MCWD nga mo-refund sa sunod nga bill sa tanang konsumidor nga gipabayad.
Gipahinumdoman ni Go ang MCWD bahin sa gimando sa Local Water Utilities Administration (LWUA) nga nagdili sa pagpabayad og minimum charge kon moabot o molapas sa 15 ka adlaw ang pagkaputol sa serbisyo sa tubig.
“I was not satisfied with that answer because there is a higher law. You cannot charge for services not rendered. That is unfair. Their policy is not the law,” matod ni Go.
Gipakita mismo ni Go ang usa ka billing invoice gikan sa Disyembre 16, 2025, hangtod Enero 15, 2026, diin nakatala nga 0 (Zero) ang nahimong konsumo sa tubig sa usa ka pamilya.
Pabilin sa 229 ang meter reading, apan gipaninglan gihapon kini sa MCWD og P235.60 nga minimum fee ug P5.23 nga franchise tax nga ang tanan niabot og P240.75.
Nakigtagbo si Go ni LWUA Administrator Jose Moises Salonga didto sa Quezon City.
Ubos sa mando sa LWUA, dili pwedeng maningil sa P235.60 minimum fee ug P8 franchise tax kon walay tubig sulod sa 15 ka adlaw o labaw pa.
Di sab pwedeng putlan sa serbisyo ang konsumidor tungod sa wala pagbayad sa panahong way agas ang ilang tubig.
Kinahanglang mopadala og report ug action plan ang MCWD sa LWUA kon moabot og 3 ka adlaw nga walay agas ang tubig ug pahibaw-on dayon ang publiko sa hinungdan ug gidugayon sa pagkaputol niini.
Human nakigtagbo si Go ni MCWD Chairman Ruben Almendras, gipadayag sa water district nga nakadawat na sila sa circular ug motuman sa pagtangtang sa minimum charge .
Gisaysay ni Almendras nga daghan sa maong kaso nahitabo human sa Bagyong Tino diin naglisod sila sa pag-restore sa tubig sulod sa halos usa ka buwan.
Apan giinsistir ni Go nga dili igo ang saad ra, kinahanglang mabalik sa mga konsumidor ang ilang nabayad na.
Gipaluyohan sab sa Cebu City Council ang lakang ni Go pinaagi sa pagpasar og resolusyon nga nagmando sa MCWD nga ipahibalo ug i-post sa ilang official website, social media, ug mga resibo aron mahibalo ang mga Sugboanon sa ilang katungod.
Nipasalig ang konsehal nga padayon niyang bantayan ang MCWD aron maseguro nga mabalik sa billing statements sa mga konsumidor. / CAV