Giinagurahan ang bag-ong parking area, lane alang sa kariton, area alang sa mga delivery van, ug material recovery facility (MRF) sa bag-ong natapos nga pagtrabaho sa Carbon Tourism Zone Phase 1.
Samtang ang mga pamilya nga nanginabuhi sa Carbon nagtrabaho na isip kabahin sa pormal nga work force sa Carbon Tourism Zone.
Si Cebu City Mayor Raymond Alvin Garcia niingon sa iyang pakigpulong niadtong Sabado, Nobiyembre 30, 2024, sa parking area sa Carbon Tourism Zone Phase 1 sa ML Quezon Boulevard, nga adunay usa ka lane nga gituyo alang sa kariton, usa ka gamay nga cart nga gipadagan sa tawo alang sa ilang mas luwas ug hapsay nga paglihok.
Matod niya, ang ML Quezon Blvd. kasagaran ang drop-off point sa mga baligya nga ihatod sa Carbon Public Market, ang gituyo nga parking area alang sa container ug delivery vans nalakip sa Phase 1.
Ang Plaza Sugbo isip kabahin sa Cebu City heritage zone, si Garcia niingon nga ang plaza dili na mahimong lugar para sa mga sakyanan. Hinuon, matod niya, adunay bag-ong parking area sa Phase 1.
BASURA
Sumala ni Garcia nga ang MRF gituyo aron matubag ang saktong paglabay sa basura ug mapalambo ang kalimpyo ug pagdumala sa kinaiyahan.
Gidugang niya nga dugay na siyang wala makakita sa ML Quezon Blvd nga organisahon.
Human sa inagurasyon sa Phase 1, gipahigayon ang turn-over ceremony alang sa bag-ong giayo nga Cebu City Carbon Police Station 5.
Ang Cebu2World Development Inc. nga gihatagan og pasidungog sa Carbon market development, maoy nagdumala sa renovation sa police station ug gi-turn over sa Cebu City Police Office.
TRABAHO
Dugang pa, ang mga indibidwal nga dugay nang nakigbisog aron mapadayon ang makahuluganon nga trabaho karon, adunay mga tahas nga makatampo sa pagpauswag sa Carbon.
Si Garcia niingon nga ang mga indibidwal nga bag-ong nakatrabaho, makadawat og mga benepisyo sama sa Social Security System, Philippine Health Insurance, ug Pag-ibig.
"This is not just progress; it's empowerment. The ones faceless have now been given identity, value, and a vital role in representing our wonderful City to all who visit here," matod ni Garcia.
Sumala sa Megawide.com, ang Carbon Tourism Zone adunay Carbon modernized market, bagsakan, Sto. Niño chapel ug park, interim public market building, Freedom Park, ug ang Barracks, nga maoy destinasyon na karon sa pagkaon.
ISYO
Sigon ni Garcia nga ang isyo tali sa C2W ug sa Compaña Maritima area giisip niya nga "water under the bridge."
"But we cannot deny that these disputes and delays halted development for over two long years," matod ni Garcia.
Kaniadto, niadtong Disyembre 23, 2022, gihatagan ni Regional Trial Court Branch 10 Judge Soliver Peras ang aplikasyon sa Cebu Port Authority (CPA) alang sa writ of preliminary injunction nga magdili sa City Government sa pag-okupar sa bisan asang bahin sa Compaña Maritima area.
Gipaboran ni Peras ang pag-angkon sa Republika sa Pilipinas ug CPA nga ang gikaaway nga lugar iya sa Baseport sa Sugbo ug busa iya sa estado.
DIPLOMATIKO
Sa iyang bahin, si Kit Comendador, CPA general manager, nagkanayon sa iyang pakigpulong niadtong Sabado nga ang CPA maoy gihimong kontrabida batok sa Cebu City Government apan uyon siya sa diplomatikong prinsipyo ni Garcia.
Matod niya, ang lugar nga gi-develop sa C2W maguba kon dili gamiton.
Gidugang niya nga sa mga panaglalis sa gobyerno batok sa gobyerno, ang katawhan ang mag-antos.
Gipasabot ni Comendador nga tungod sa nitaliwan nga kongresista nga si Raul del Mar, gihimo sa naulahi nga usa ka Cebu Port Authority area ang mga pantalan sa dakbayan sa Sugbo uban sa pagtugot sa Republic Act no. 7621 niadtong 1992. / JPS