Mekaniko patay, ‘naunay’ sa armas?

Local News Official
Local News OfficialSunStar File Photo

Patay nang nadiskobrehan ang usa ka mekaniko sa iyang gikatulgan nga folding bed sud sa iyang gitrabahoan nga grahian sa usa ka taxi company sa Barangay Tingob, siyudad sa Mandaue, alas 3:00 sa kaadlawon, Dominggo, Nobiyembre 26, 2023.

Sumala sa kasayoran sa Superbalita Cebu gikan sa kasaligang tinubdan, ang biktima giila nga si Buenaventura Divinagracia, 46, minyo, mekaniko ug taga Brgy. Sohoton, lungsod sa Badian.

Matod pa nga ang biktima katapusang namatikdan sa iyang mga kauban sa trabaho nga medyo hubog nga natulog sa folding bed nga nag-inusara.

Apan alas 3:00 sa kaadlawon, namatikdan sa iyang kauban nga nagkadugo ang ila­wom sa folding bed ug ilang nasuta nga dunay .22 magnum revolver sa ilawom sa fol­ding bed hinungdan nga gi-report kini sa Police Station 4 sa Mandaue City Police Office (MCPO).

Sa imbestigasyon sa Police Station 4 ubos sa kamandoan sa ilang station commander nga si Police Maj. Mikhail Mallorca, nasuta nga ang maong armas gipanag-iya sa maong mekaniko.

Gisusi pa sa kapulisan ang kamatayon sa mekaniko apan nagduda nga naunay kini sa armas nga posibling nibuto sa pagkahulog hinungdan naigo kini sa iyang buko-buko.

Apan walay nadunggang buto sa armas tungod sa kaku­sog sa sound sa disco atol sa piyesta sa dapit, dason sa kapulisan.

Ang biktima gidala sa iyang mga kauban sa ospital apan nakabsan na kini sa kinabuhi.

Samtang, palawman pa sa kapulisan sa pagsubay sa ma­ong hitabo ug gikatakda nga ipaubos kini sa autopsy aron masuta nga wala foul play sa kamatayon niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph