On call nga mekaniko nga nag-sideline pagpamaligya og illegal nga drugas ang nasikop atol sa buy-bust nga gipahigayon sa mga sakop sa Tagbilaran City Police Station sa alas 6:11 sa gabii, Biyernes, Hunyo 13, 2025 sa Purok 3, Barangay San Isidro, siyudad sa Tagbilaran.
Ang suspek giila nga si Jhon Zalde Good, 27, taga Barangay Booy, siyudad sa Tagbilaran.
Nakuha sa mga sakop sa City Drug Enforcement Unit sa Tagbilaran City Police Station ang mga pinakete sa gituohang shabu nga motimbang sa 5 gramos nga dunay standard drug price nga P34,000.
Matud ni Police Lieutenant Colonel John Kareen Escober, ang hepe sa Tagbilaran City Police Station, nga walay trabaho ang maong suspek apan adunay mokuha sa iyang serbisyo isip usa ka mekaniko.
Samtang wala pa kiniy trabaho mamaligya usab kini og illegal nga drugas base sa ilang nakuha nga impormasyon atol sa pagpaubos nila sa monitoring.
Ang pagkasikop sa maong drug personality kabahin sa gipatuman sa kapulisan nga Oplan Limpyo Tagbilaran diin tinguha nila nga mapuhag ang tanang mamaligya og illegal nga drugas sa ilang siyudad.
"This arrest showed our unwavering commitment to clean the city from illegal drugs. We continue to push forward under Oplan Limpyo Tagbilaran with the support of our community and the Local Government of Tagbilaran,” matud ni Escober. / AYB