Laing menor de edad ang na-buy-bust sa mga sakop sa Sawang Calero Police Station 6 sa Cebu City Police Office alas 3:50 sa kaadlawon sa Miyerkules, Hunyo 11, 2025, sa Abellana Street, Barangay Pasil, Dakbayan sa Sugbo.
Ang maong menor nga na-rescue giila sa alyas nga si Daan, 16, taga Sitio Mahayahay, Barangay Pasil.
Nakuha kang Daan ang mga pinakete sa gituohang shabu nga motimbang sa 5.18 gramos nga dunay standard drug price nga P35,224.
Una na nga nakadawat og report ang Parian Police Station nga dunay usa ka batan-on ang kusog kaayo nga mamaligya og ilegal nga drugas sa maong lugar hinungdan nga gipaubos sa monitoring.
Apan nakurat na lang ang kapulisan nga usa diay kini ka menor de edad maong gilusad dayon ang pag-rescue pinaagi sa pag-buy-bust.
Gisusi na sa kapulisan kon asa magkuhaan sa iyang ilegal nga drugas si Daan alang sa ilang himuon nga follow up.
Nasayran nga duna kini amo nga maoy tighatagan sa suplay sa ilegal nga drugas. / AYB