Usa ka 14 anyos nga lalaki ang gi-rescue sa kapulisan sa Lunes sa kaadlawon, Mayo 26, 2025, human nakuhaan og ilegal nga drugas atol sa checkpoint operation sa Barangay Subangdaku, Dakbayan sa Mandaue.
Ang menor de edad nga giila sa alyas nga JM, taga Barangay San Roque, Siyudad sa Talisay, gisita sa alas 3:55 sa kaadlawon sa mga police personnel nga nagpahigayon og routine checkpoint sa may M. Logarta Street, Dakbayan sa Mandaue.
Sa usa ka interbyu niadtong Lunes, si Mercy Villaro, tigpamaba sa Mandaue City Police Office (MCPO), nagkanayon nga nakit-an sa mga polis ang bata nga nagkupot og heat-sealed transparent sachet nga dunay sulod nga powder nga gituohan'g shabu.
Ang nakumpiskar nga butang adunay gibug-aton nga 0.04 gramos nga mobalor sa P272.
Gi-turnover na sa kapulisan ang menor de edad sa City Social Welfare Services (CSWS) para sa tukmang interbensyon ug disposisyon, subay sa protocol alang sa mga bata nga malapason sa balaod kon Children in Conflict with the Law (CICL).
Ang nasakmit nga ebidensiya gisumite na sa Regional Forensic Unit para sa laboratory analysis.
Nagpadayon pa ang kapulisan sa ilang imbestigasyon aron sutaon kon si kinsa ang gikuhaan sa menor sa ilegal nga drugas.
Giawhag ni Villaro ang publiko nga mosuporta sa ilang pagpakigbatok sa illegal nga drugas pinaagi sa pag-report kanila kon aduna silay masigpatan nga ilegal nga kalihukan sama sa ilegal nga drugas, hilabina kon kini langkuban sa mga menor de edad. / CAV