Ang Mandaue City Government nagpalig-on sa ilang mental health program pinaagi sa pag-integrate sa mental health care ngadto sa treatment plans sa mga drug user.
Tumong niini nga programa mao ang pagtagad sa mga isyo sa pag-abuso sa kemikal.
Samtang, dungan ang pagtubag sa mga panginahanglanon sa kahimsog sa pangisip, matod ni Ebenezer Daryl Manzano, pangulo sa Mandaue City Substance Abuse Prevention Office (MCSAPO).
Aron mahimo kini, ang mga barangay health worker gibansay sa pag-ila sa mga timailhan sa mga problema sa kahimsog sa pangisip aron sila makahatag sa tukma sa panahon nga mga referral, sulti ni Manzano sa mga tigbalita sa Martes, Hulyo 2, 2024.
Si Manzano niingon nga ang mga barangay gikinahanglan nga modumala sa kaugalingong mental health referrals.
Ang Siyudad, matod niya, nakigtambayayong usab sa Philippine Mental Health Association sa paghimo og binuwan nga mga caravan nga nagtanyag og libreng serbisyo sa pangisip.
Matod ni Manzano nga kining bag-ong programa gibase sa community-based mental health initiative nga gilusad sa miaging tuig ubos sa administrasyon ni Mayor Jonas Cortes. Kini nga inisyatiba nagkinahanglan sa mga health worker ug mga doktor sa kabarangayan nga i-refer ang mga indibidwal nga nagpakita og mga timailhan sa problema sa pangisip sa MCSAPO alang sa interbensyon. Ang MCSAPO adunay kritikal nga papel isip triage area, nga nagkonektar sa mga indibidwal sa mga psychologist ug psychiatrist, dugang niya. / CAV