Giangkon sa trainer ni World Boxing Council (WBC) welterweight champion American Mario Barrios nga nibahad siya nga sa hospital o menteryo ang paingnan ni Filipino boxing legend Manny Pacquiao human sa gikahinamang away karong Dominggo, Hulyo 20, 2025 (PH time), sa MGM Grand Garden Arena sa Las Vegas, USA.
Apan giklaro ni Bob Santos nga aduna siya’y balidong rason nganong nakasulti siya niini.
Nasayod si Santos nga daghang Filipino fans ang wala nakauyon sa iyang gipanulti ug nihatag siya og katin-awan kon nganong iyaha kining gibatbat.
Gipasabot ni Santos nga kinahanglang mao kini ang mentalidad ni Barrios aron pag-alkontra sa mentalidad sab ni Pacquiao, kinsa iyang gihulagway nga usa ka “killer” ibabaw sa ring.
“I tell you, if that’s not our mindset against Manny Pacquiao, we’re gonna be in a hospital or cemetery because he’s an absolute assassin, he’s an absolute killer,” pasabot ni Santos nga napatik sa Spin.ph.
“If you do not have the kill-or-be-killed mindset with him, it’s good night. Manny always had the mindset of kill or be killed.”
Gitataw ni Santos nga nakasuweto siya sa abilidad ug mentalidad sa Pambansang Kamao ng Pilipinas gumikan kay nagtabang siya sa training niini kaniadto sa Wild Card gym sa Los Angeles.
“I know Manny very well. We did a lot of sparring sessions with Manny at the Wild Card so nobody’s more respectful of Pacquiao than me,” dugang ni Santos, kinsa maoy 2022 Trainer of the Year sa The Ring ug Sports Illustrated.
Gihulagway ni Santos si Pacquiao nga maoy labing maayong tawo sa boksing apan dali kining mahimo nga mangtas ibabaw sa ring.
Tungod niini, gibutyag ni Santos nga grabe ang iyang pag-train ni Barrios, kinsa manghod og 16 ka mga tuig ni Pacquiao, 46, kinsa maoy bugtong eight-division world champion.
“I think this is the hardest camp Mario Barrios had in his career,” matod ni Santos.
Kon kabangis lang ibabaw sa ring ang hisgutan, matod ni Santos nga labaw pa si Pacquiao kumpara ni kanhi undisputed heavyweight champion Mike Tyson. / ESL