Meralco kampyon na gyud!

Meralco kampyon na gyud!
KAMPYON. Malipayong nagpahulagway ang mga sakop sa Meralco Bolts human nila naangkon ang labing una nilang kampyunato sa PBA niadtong Dominggo sa gabii, Hunyo 16, 2024, sa Smart Araneta Coliseum. / PBA.PH

Human sa 14 ka mga tuig, nakabaton na gyud og kampyunato sa Philippine Basketball Association (PBA) ang Meralco Bolts.

Daw lungag sa dagom ang gilutsan sa Bolts una nila nabuntog ang gikahadlukang San Miguel Beermen, 80-78, sa Game 6 nga maoy naghuman sa PBA Season 48 Philippine Cup championship series, 4-2, niadtong Dominggo sa gabii, Hunyo 16, 2024, sa Smart Araneta Coliseum.

Usa ka talagsaong three-point shots sa Sugboanong higante sa Beermen nga si June Mar Fajardo ang nagtabla sa duwa, 78-78, sa nahabiling 3.3 segundos.

Sa return play, gimugna ni Bolts guard Chris Newsome ang nakapadaug nga fall-away shot sa nahabiling usa ka segundo.

Daling nitawag ang Beermen og timeout unya pagbalik sa aksyon, nasipyat na si Fajardo sa lain niyang three-point attempt dungan sa pagtingog sa final buzzer.

Human sa duwa, nagkana­yon si Newsome nga ang nakapadaug niyang itsa gipraktis niya sa matag adlaw sukad pa kaniadto.

Si Newsome, kinsa nitali og 15 puntos aron pangulohan ang kadaugan, maoy hiniusang napili nga PBA Press Corps-Honda Finals MVP.

Ang Bolts nakaposte og 17 puntos nga labaw sa 1st half apan inanay kining gikitkit sa Beermen hangtod nga ningsikit ang duwa sa hinapos nga bahin.

Kalima nakasulod sa finals ang Bolts apan karon lang sila ninglampos pagsakmit sa korona.

Gipakyas ang Bolts sa ilang higpit nga karibal nga mao ang Brgy. Ginebra Gin Kings sa nag-unang upat ka mga higayon nilang pagtaak sa finals.

Puntos matag usa:

Meralco (80) – Newsome 15, Maliksi 14, Quinto 11, Banchero 10, Almazan 9, Hodge 6, Caram 6, Torres 6, Bates 3.

San Miguel (78) – Fajardo 21, Perez 14, Lassiter 11, Tautuaa 10, Romeo 9, Trollano 7, Enciso 5, Ross 1. / ESL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph