Gitudlo ang Meralco Bolts isip bugtong representante sa Philippine Basketball Association (PBA) alang sa East Asia Super League (EASL), nga mosugod karong Oktubre 8, 2025.
Kini maoy ikatulong sunodsunod nga higayon nga moduwa ang Bolts sa regional club tournament.
Sa premirong pagsalmot sa Bolts sa torneyo niadtong 2023, kauban nila ang TNT Tropang 5G. Niadtong higayuna, nanamilit og sayo ang Bolts nga bawon ang 1-5 nga rekord.
Nibalik pagduwa ang Bolts sa torneyo niadtong 2024 diin nakarehistro sila og duha ka sunodsunod nga kadaugan batok sa Macau Black Bears ug Busan KCC Egis apan human niini, tulo ka sunodsunod nga kapildihan ang ilang nasinati nga maoy nagtuldok sa ilang kampanya sa 12-team tournament.
Ning higayuna, ang Bolts nahisakop sa Group B kauban ang Black Bears lakip na ang Final Four teams nga Taoyuan Pauian Pilots ug Ryukyu Golden Kings.
Naa sa Group A ang Hong Kong Eastern, Seoul SK Knights, Taipei Fubon Braves, ug Utsonomiya Brex samtang naa sa Group C ang Alvark Tokyo, Changwon LG Sakers, New Taipei Kings, ug Ulaanbaatar Xac Broncos. / ESL