NUNOT sa kasaulogan sa National Women’s month, ang tanang mga babayeng polis sa Cebu City Police Office (CCPO) gimanduan nga mopahigayon og Ronda Cebu-Juana Bulabog kaduha sa usa ka semana.
Gidasig ang mga babayeng polis nga moagni sa nagkalainlaing women’s organization sa barangay nga mouban kanila isip force multipliers sa pagpatuman sa kahusay ug kalinaw.
Sa memorandum, penitsahan og Marso 12 nga gipirmahan ni Police Lieutenant Colonel Miguel Andeza , acting chief sa Communication sa CCPO iyang giklaro ang tumong sa operasyon.
“The primary focus of this initiative is to address children who are violating curfew,” matod ni Andeza.
Sa Barangay Inayawan, ang Gender and Development (GAD) focal person, Abraham Diaz maoy nangulo sa nagkalainlaing women’s organization sa pag-uban sa Oplan Bulabog.
Ilang gisud ang mga internet cafe nga dunay mga menor de edad nga nagduwa bisan lapas na sa alas 10:00 sa gabii.
Gipasidan-an sab ang mga internet cafe nga papaulion na ang mga bata kon oras na sa curfew.
“Kita sa Inayawan kada gabii gyud ang pag-roving sa atong mga barangay tanod ug daghan atong ma-rescue nga mga minor, kadaghanan di taga dinhi (Inayawan) nga nilapas sa curfew,” matod ni Diaz.
Daghan ang na-rescue nga mga bata apan gipapauli lang human gipanglista ang mga ngalan ug gipasidan-an nga di na mousab paggawas basta oras na sa curfew.
Lakip sa niuban sa Ronda Cebu - Juana Bulabog ang kababayen-an sa silingan mga barangay nga sakop sa area of responsibility sa Inayawan Police Station 7. / VLM