PADAYON ang operasyon sa pagpamadlong ug pagpauli sa mga Badjao sa City Social Welfare and Development Office (CSWDO) sa Lapu-Lapu City Hunyo 17, 2025, taliwala sa ilang pagsaulog sa 64th Charter Day.
Nag-roving ang mga staff sa CSWDO sa kadalanan sa Lapu-Lapu aron mamadlong sa mga nanglimos, lakip na ang mga Badjao ug uban pang grupo.
Ang ilang gihimong operasyon nagtumong sa pagpatuman sa Presidential Decree No. 1563 o ang Anti-Mendicancy Law nga nagdili sa pagpanglimos sa pampublikong lugar ug sa paghatag ug limos.
“Atoa silang gipasakay sa atong service van ug gihatod sa pier para makauli balik kung asa sila gikan’’, matod sa pamahayag sa CSWDO.
Nasayran nga naa sa 10 ka mga makalilimos ang gihatod pauli sa Mambaling area.
Matod sa maong buhatan, nagkaanam na ug kaminos ang nanglimos kung ikumpara sa mga miaging buwan.
Ang maong lakang gihimo aron malikayan ang mga disgrasya ilabi na sa mga kabataan nga kasagaran naapil sa pagpanglimos sa kadalanan.
Nagpasalamat sab ang CSWDO sa suporta sa Lapu-Lapu City Rescue nga nitabang sa paghatag ug transportasyon sa mga nadakpan, ug sa ilang mga staff nga walay puas nga nitabang bisa'g holiday. / Jairus Antonio Zoilo Amora, Holy Name University Intern