Mga bata ‘nagmerida’; may mihilak, mihapuhap

‘NAGPARAMDAM’: Makita sa mga hulagway nga gi-post ni Melson Bayaton, sa iyang Facebook, ang mga hayop nga kanunay pagalawgan sa iyang mga anak matag buntag. Ingon sa nanultol ang mga hayop sa nahimutangan sa mga bata. Nagtuo ang pamilya nga ang mga kalag sa mga bata nagparamdam. / ARNOLD Y. BUSTAMANTE
‘NAGPARAMDAM’: Makita sa mga hulagway nga gi-post ni Melson Bayaton, sa iyang Facebook, ang mga hayop nga kanunay pagalawgan sa iyang mga anak matag buntag. Ingon sa nanultol ang mga hayop sa nahimutangan sa mga bata. Nagtuo ang pamilya nga ang mga kalag sa mga bata nagparamdam. / ARNOLD Y. BUSTAMANTE

Ingon sa nagmerida ang duha sa tulo ka mga bata pipila ka mga adlaw sa wala pa ang sunog sa alas 5:51 sa buntag sa Huwebes, Nobiyembre 23, 2023 sa Sitio Upper Capaculan, Brgy. Tisa, dakbayan sa Sugbo.

Ang mga bata tagsa-tagsa nga ningpakita og di nila naandan nga mga lihok ug ningpadayag sa tumang pagmahal nila sa ilang inahan.

Si Cristine Cabornay, inahan sa tulo ka mga bata, nibutyag nga duha ka adlaw sa wala pa ang sunog, ang iyang anak nga si Crylle, 6, maghilak dihang ilang ihatod sa eskwelahan alang sa klase niini sa grade 1.

Nahibulong sila kay dili kini naandan sa ilang anak sa pa­nahon nga ihatod sa tunghaan.

Gusto ni Crylle nga dili mopauli ang iyang inahan, huwaton siya hangtod mahuman ang klase.

“Nahibulong mi kay ang among anak dili ingon ana makahilak,” asoy ni Cristine sa Superbalita Cebu sa Biyernes, Nobiyembre 24, 2023.

Nianang gabii sa Miyerkules, Nobiyembre 22, si Angelo, 10, nitawag kaniya nga matulog na sila nga di usab naandan sa bata.

Niasoy si Christine nga gihilot pa sa iyang anak ang iyang buko-buko sa wala pa matulog.

Si Crylle milambing sab sa paghapuhap sa iyang buhok.

Wala niya damha nga katapusan na diay kadto nga iyang ikauban ang iyang mga anak nga pwerteng nakalambing kaniya.

Si Clorit Baculi, 12, ig-agaw, nipadayag nga suod kaayo niya si Angelo ug maoy iyang kanunay ikaduwa isip

Samtang ang usa ka tuig nga si Krystyna iyang gipakisama nga manghod, kugos-kugoson ug magdungan sa pagpangaon.

Naemosyonal usab ang mga tawo sa gihayaan sa mga bata human nanuol sa haya ang mga manok ug itik nga kanunay lawgan nila mabuntag sa buhi pa.

Sa video, makita nga ingon sa dunay gituka ang mga hayop, samtang ang usa ka manok nagdungoy, ingon sa naa sa kaguol.

Gawas kanila ni Angelo, Crylle ug Krystyna, namatay usab ang ilang 11 ka buwan nga ig-agaw nga masuso nga si Ameri Zane.

Ang mga bata gi- cremate sa Huwebes sa gabii ug ilubong karong Dominggo kay gusto sa pamilya.

‘WA NAY ANAK’

Si Melson, sa iyang Facebook post pipila ka mga oras human sa sunog, niingon nga wa na makasulod ang iyang asawa sa kadaku na sa kayo aron unta sila luwason.

“Wala gyud mi kabalo unsay rason sa Ginoo nganong naingon ani ang tanan. Sakit kaayo isip usa ka ginikanan mawagtangan tanan anak,” post ni Melson.

Nisaad si Melson sa mga bata nga “magpakalig-on” alang sa inahan taliwa sa tumang kasakit nga ilang gibati human sa kamatayon sa tanan nilang mga anak.

45 KA ADLAW PA

Si FO3 Fulbert Navarro, imbestigador sa Cebu City Fire Office (CCFO), nagkanayon karong adlawa, Sabado, ilang ipadala sa ilang laboratoryo sa Bureau of Fire Protection (BFP) sa Quezon City ang samples nga ilang nakuha gikan sa nasunogan.

Kini naglakip sa wire kur­yen­te, kalan ug ubang ma­gamit sa forensic investi­gation.

Molanat pa og labing dugay 45 adlaw una masayran ang resulta.

Tagsa-tagsaon usab nila og imbetar ang mga nasunogan og testigos sa pagpalawom sa imbestigasyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph