Taudtaod nang giatubang sa Barangay Tejero, Dakbayan sa Sugbo ang ilegal nga drugas apan nahimong hagit sa mga opisyal ang mga menor de edad nga nalambigit niini.
Gitumbok nga hinungdan mao ang kawad-on sa kinabuhi sigon pa ni Barangay Kapitan Harold Seno rason nga napugos sa pagsulod sa maong binuhatan sa tinguha nga mokita.
Apan kon adunay hugot nga pagpatuman sa balaod sa pagluwas sa kabataan nga nalambigit sa maong ilegal nga binuhatan, nakita nga usa sa mga solusyon mao ang pagtanyag og legal nga panginabuhian o livelihood. Sa maong paagi mahupay ug maibanan ang problema nga giatubang sa barangay.
“Sa wala pa gani ko (makapitan), ang Tejero is red-tagging gyud na, naa gyud na sa CCPO sa region, gipahibawo ko nila, ang Tejero is apil gyud sa red-tagging sa drugs awareness, naa gyud na,” matod ni Seno sa usa ka eksklusibong pakighinabi sa Superbalita Cebu niadtong Lunes, Marso 24, 2025.
MAMARUKAY
Gibutyag ni Seno nga bisan og nagpadayon ang ilang pagsunod sa nasudnong programa batok sa ilegal nga drugas susama sa Oplan Bulabog, Community Based Drug Rehabilitation Program (CPDRP) ug Barangay Anti Drug Abuse Council (Badac), adunay mga bata nga gigamit sa ‘pagpamaruk’ o tigbaligya sa ilegal nga drugas tungod kay dili sila mabilanggo.
“Ang ato lang unta ani, livelihood lang unta kay para gud nila sayon ra man gud kaayo ang sa ila ang drugs. Mao gyud na diri sa among barangay, wa gyud na mawala gihapon ang drugs karon,” pulong pa ni Seno.
Gipamatud-an usab kini ni Tejero Councilor Nino Lao, chairman sa Peace and Order Committee nga niingon nga adunay napulo ka menor de edad ang nalakip sa ilang listahan sa mga nalambigit sa pagpamaligya og ilegal nga drugas nga shabu.
“Sa among watchlist, niabot og 200 ka surrenderers sa panahon pa ni (Former President) Digong, pero karon 46 na ang naka-graduate (wala na namaligya). Pero kaning (200) naay namatay na or niuli sa probinsiya, wala na na diri,” matod ni Lao.
“Ang problema, kasagaran sa among gi-monitor, mga bata na ang maninda og druga,” dugang niya.
LINGHOD PA KAAYO
Nagkanayon si Seno, nga adunay mga nag-edad og 10-anyos ug 14-anyos nga nalambigit ani sa pagpamaligya sa ilegal nga drugas.
Tungod sa limitasyon sa balaod ilabina sa mga batan-on, ang barangay wala’y gahom sa igong rehabilitasyon ug proteksyon sa mga menor de edad nga dili kapugngan sa maong ilegal nga binuhatan.
Ang ilang mahimo lang mao ang pag-report sa ginikanan ug pag-record sa ilang impormasyon.
“Tinuod nga kami sa barangay naningkamot, pero kon walay suporta sa tibuok LGU, lisod kini sulbaron. Kuwang usab mi og personnel kay ang among mga tanod walay armas, dili kini respetuhon sa mga dautang elemento,” pasabot ni Seno.
Matod ni Lao nga kon madakpan man gani ang mga menor de edad, bisan isurender ngadto sa Department of Social Welfare and Services (DSWS), gihulagway nga “hanging’ o huyang ra ang implementation sa turn over.
Lakip sa ilang paningkamot ang CBDRP, Oplan Bulabog ug Badac diin nagpatuman sila og house-to-house nga pagpahibawo.
Personal usab nga inisyatiba ni Seno ang pagpanghatag og lima ka kilo nga bugas alang sa drug surrenderers aron matabangan silang makabiya sa ilegal nga bisyo.
Apan matod ni Seno nga nagkinahanglan pa og dugang suporta gikan sa mga ahensiya sa kagamhanan ug mas lig-on nga balaod alang sa kampanya batok sa mga kabataan nga gamiton nga runner sa drug pushers o drug lord.
“Dapat usbon gyud ang balaod kay kami sa barangay maglisod og patuman kon ang mga minor nga nalambigit sa ilegal nga druga mapagawas ra,” matod ni Seno. / CDF