Giawhag ang mga batan-on nga moboto sa labing unang higayon karong umaabot eleksyon sa Mayo 2025 nga moapil sa pagpakigbatok sa mga sayop nga impormasyon sa online.
Si Leo Lim, pangulo sa Education and Information Division sa Comelec, niingon atol sa Voter Education ug Automated Counting Machine (ACM) demonstration sa Cebu City Hall niadtong Lunes, Abril 7, 2025, nga kini nga mga kalihokan nagtumong sa paghatag ug gahom sa mga batan-on nga mahimong mas masinabtanon mahitungod sa impormasyon nga ilang gigamit online, ilabi na sa social media platforms nga sagad gigamit sa pagpakatap sa sayop nga impormasyon nga may kalabotan sa eleksyon.
Matod ni Lim nga 35 ngadto sa 40 porsyento sa populasyon sa mga botante sa nasod gilangkuban sa mga batan-on ug mga batan-ong propesyonal.
“Ang importante ay ma-engage natin sila para mag-participate sa electoral process,” matod ni Lim.
Dugang niya nga ang sayop nga impormasyon nagpabilin nga usa sa pinakadako nga hulga sa patas nga eleksyon, ilabi na sa internet nga usa ka nag-unang tinubdan sa impormasyon alang sa mga batan-on.
Isip kabahin sa ilang estratehiya, ang kampanya naglakip usab sa pakigtambayayong sa mga news organization, mga influencer, ug mga opisyales sa gobyerno alang sa tukma ug engsakto nga mga social media content.
Si Ella Nicole Mata, presidente sa Cebu City Federation of Tertiary Supreme Student Government and Council, maoy usa sa mga estudyante gikan sa nagkalain-laing unibersidad ug kolehiyo nga giimbitar sa pagsalmot sa programa. / EHP