Samtang nisulod sa habagatan sa nasod ang bagyong “Kabayan” nga nakaapekto sa Mindanao ug Visayas, gikanselar sa Cebu Port Authority (CPA) ug Philippine Coast Guard (PCG-7) ang pipila ka mga biyahe sukad niadtong Dominggo, Disyembre 17.
Apil niini ang mga biyahe sama sa Cebu ngadto sa Ormoc, ngadto sa Hilongos, ngadto sa Tubigon, ngadto sa Talibon, ngadto sa Tagbilaran, ngadto sa Surigao, ngadto sa Calbayog, ngadto sa Mentac, ngadto sa Nasipit, ngadto sa Iloilo, ngadto sa Ubay, ngadto sa San Carlos, ngadto sa Escalante, ug ngadto sa Sagay City .
Hinuon, sa mga alas 5 sa hapon sa Lunes, Disyembre 18, ang Cebu Port Authority (CPA) nipabalik na sa biyahe human gilibkas ang typhoon signal sa paghinay sa bagyo.
Sa laing bahin, si Mactan-Cebu International Airport Authority (MCIAA) General Manager Julius Neri nitug-an sa SunStar Cebu sa Lunes nga biyahe gikan sa Sugbo paingon sa Siargao, Surigao ug Ozamis gikanselar tungod sa TS Kabayan.
Ang Tropical Cyclone Wind Signal (TCWS) No. 1 gipataas sa Southern Leyte, Leyte, ang habagatang bahin sa Samar (Basey, Santa Rita, Marabut, Talalora, Villareal, Pinabacdao), ang habagatang bahin sa Eastern Samar (Maydolong, Lungsod sa Borongan, Quinapondan, Guiuan, Lawaan, Balangiga, Lorente, Giporlos, Salcedo, Balangkayan, General Macarthur, Hernani, Mercedes), Cebu lakip ang Camotes ug Bantayan Islands, Bohol, Siquijor, Negros Oriental, Negros Occidental, ug Guimaras.
Sa ilang Facebook post, ang CPA nipahibawo sa paghibalik sa biyahe gikan sa Sugbo paingon sa Tagbilaran City ug Ubay, Bohol; Nasipit, Surigao ug Cagayan de Oro City sa Mindanao ug Iloilo.
Gipabiyahe na sab ang paingon sa Hilongos ug Ormoc City sa Leyte.
Sa laing bahin, si Cordova Mayor Cesar “Didoy” Suan nideklarar og ‘No Classes’ sa Disyembre 18 alang sa tanang elementary, secondary, ug tertiary public ug private schools sa maong lungsod.
“Dili nato gusto i-risgo o usa alang-alang ang health and safety sa tanang estudyante ug moadto sa Cordova,” matod ni Suan sa usa ka pamahayag niadtong Dominggo. (EHP, RJM, REV)