Lalaki’ng missing sud sa usa ka tuig kapin kalabera nang nakaplagan alas 9 sa buntag sa Huwebes, Abril 18 , 2024 sa Sityo Dalayday, Brgy. Lunop Bukid, Boljoon, habagatan sa lalawigan sa Sugbo.
Si Nexel Nibla, 29, minyo, nagpuyo sa maong dapit, giila sa iyang inahan base sa gisul-ob niini.
Sa interbyo sa Superbalita sa Boljoon Municipal Police Station nasuta sa imbistigasyon sa kamanduan sa ilang hepe nga si P/Capt. Michael T. Sevilla nga si Nibla gipa-blotter niadtong Marso 2 , 2023 nga na missing kay matod pa nag nervous breakdown.
Kalit kini nga nidagan padulong sa kalasangan sa maong bukid ug bisan giunsa pagpangita, wa na ma kit-i.
Apan alas 9:00 sa buntag sa Huwebes, si Barangay Konsehal Jovert Estella nipahibalo sa kapulisan sa Boljoon nga matod pa may nakit-an nga mga bukog sa tawo kilid sa sapa sa Sityo Dalayday, Brgy. Lunop ug giadto dayon ang lugar.
Ang inahan nga si Felicisima Nibla positibo’ng niila sa iyang anak nga na missing sud na sa sobra sa usa ka tuig nga si Nexel gumikan sa iyang sapot labina sa pantalon nga gisul-ob niini nga na recover sa maong dapit.
Si Felicisima Nibla way pagduda nga may foul play ang kamatayon sa iyang anak gumikan sa nervous breakdown nga mahadlok og tawo ug nagtagotago sa lasang nga wa nay kaonkaon nga posibling hinungdan sa kamatayon. / DVG