Gimanduan ni Presidente Ferdinand “Bongbong” Marcos Jr., ang tanang Cabinet secretaries sa pagsumite sa ilang “courtesy resignation,” aron “i-realign ang gobiyerno subay sa expectation sa katawhan.”
Sa usa ka pamahayag, ang Presidential Communications Office (PCO) nagkanayon nga ang panawagan ni Marcos nagtumong sa paghimo og luna alang sa pag-evaluate sa performance sa matag departamento ug pagtino kon kinsa ang magpadayon sa pagserbisyo subay sa giusab nga prayoridad sa administrasyon.
Dugang pa sa PCO nga kini nga lakang nagtimaan sa usa ka tin-aw nga transisyon gikan sa sayong bahin sa pagdumala ngadto sa mas naka-focus ug performance-driven nga pamaagi.
“This is not business as usual. The people have spoken, and they expect results—not politics, not excuses. We hear them, and we will act,” matod sa presidente.
“This is not about personalities—it’s about performance, alignment, and urgency. Those who have delivered and continue to deliver will be recognized. But we cannot afford to be complacent. The time for comfort zones is over,” siya nidugang.
Gi-emphasize ni Marcos ang nag-usabusab nga panginahanglan sa nasod, nga nagkinahanglan og “renewed alignment, faster execution, and a results-first mindset.”
Gipasaligan sa presidente ang publiko nga ang serbisyo sa gobiyerno magpabilin nga dili mabalda sa panahon sa transisyon.
Siya nagkanayon nga ang administrasyon mosulod sa usa ka bag-ong yugto—usa nga mas hait, mas paspas, ug bug-os nga naka-focus sa labing dinalian nga panginahanglan sa katawhan.
Lakip sa mga Cabinet secretaries nga diha-diha nagpahayag sa ilang kaandam sa pagsumite sa ilang “courtesy resignations” mao sila Interior and Local Government Secretary Jonvic Remulla, Social Welfare and Development Secretary Rex Gatchalian, Information and Communications Technology Secretary Henry Aguda, Budget Secretary Amenah Pangandaman, Transportation Secretary Vince Dizon, ug Metropolitan Manila Development Authority Chairman Romando Artes.
Sa una nga yugto sa BBM Podcast nga gisibya kaniadtong Lunes, Mayo 19, giingon ni Marcos nga ang resulta sa bag-o lang natapos nga 2025 nasyonal ug lokal nga eleksyon nagpakita nga ang mga Pilipino “gikapoy na sa politika” ug nangayo og mas konkretong aksiyon gikan sa ilang mga lider.
Giangkon niya ang kasagmuyo sa publiko sa hinay nga serbisyo sa gobiyerno sa pagtubag sa ilang inadlaw-adlaw nga panginahanglan. / TPM