Tibuok pamilya, nga naglakip sa anak ug mga ginikanan, nga nalambigit sa pagpamaligya sa ilegal nga drugas, nasikop sa mga sakop sa Sawang Calero Police Station sa Cebu City Police Office (CCPO) sa buy-bust sa dan Gen. Gines, Barangay Suba, dakbayan sa Sugbo, alas 9:35 sa gabii sa Martes, Nobiyembre 14, 2023.
Ang mga suspek giila sa mga opisyal sa barangay ug saksi nga sila’ng Froilan Laborte Alba, 25, maoy target sa buy-bust; iyang mga ginikanan nga sila si Luisito Librea Alba, 51, ug Geralyn Laborte Alba, 44, pulos mga molupyo sa naasoy nga dapit.
Nakuha sa kapulisan gikan sa mga suspek ang mga pinakete sa gituohang shabu nga motimbang og 15.3 gramos nga dunay standard drug price nga P104,040.
Matod ni Police Major Francis Renz Talosig, hepe sa Sawang Calero Police Station, taudtaod na nga nalambigit sa ilegal nga drugas ang maong pamilya.
Ang ilang target ang anak niini nga si Froilan, diin duna kini amo nga giila nga usa ka alyas ‘Edcel’ nga maoy supplier.
Sa dihang gikasabot kini sa iyang personnel, gitawag dayon niya ang iyang mga ginikanan aron mangayo og dugang drugas tungod kay duna pay laing kustomer.
Atol sa pagtunol sa amahan ug inahan sa mga pinaketeng shabu, diha na nipaila ang polis nga gihatagan niini.