Dili momenos 22 ka mga grupo sa transportasyon sa Sugbo ug mga kooperatiba ang nagtapok sa Fuente Osmeña Circle alang sa usa ka “unity walk” niadtong Lunes, Agusto 5, 2024, nga nagpadayag sa ilang pagsupak sa tinguhang pagpasuspenso sa Public Utility Vehicle Modernization Program (PUVMP).
Gibanabana nga moabot sa 1,500 ka mga partisipante ang misalmot sa maong rally nga gilangkuban sa mga drayber, konduktor sa sakyanan, ug mga empleyado sa opisina nga nagmartsa gikan sa Fuente Osmeña Circle paingon sa nag-unang opisina sa Land Transportation Franchising and Regulatory Board (LTFRB) Region 7 sa Cebu City.
Si Ellen Maghanoy, presidente sa Federation of Cebu Transport Cooperatives (FCTC), nanawagan sa mga partisipante sa “unity walk” nga ipadayon ang ilang lig-on nga pagsupak sa bag-ong gi-propose nga temporary suspension sa PUVMP sa Senado.
Gisulti ni Maghanoy nga ang unity walk mao’y pamatuod sa ilang pagbarog batok sa resolusyon.
“Nagsugod na man gyud ta, di na na pwede nga i-hunong kay naka invest na man gud. Dako kaayo na nga insulto sa amoa kay kami man mi-comply. Kami mi embrace sa modernization program. Nya di na sad makatarungan nga yano-yanohon na la’g suspension sa atoang mga senador,” matod pa ni Maghanoy.
Si Maghanoy nagtinguha usab og hustisya alang sa mga naapektuhan nga mga grupo sa kooperatiba ug sa ilang mga drayber nga maapektuhan sa gisugyot nga suspension, nga mipunting nga ang uban kanila nag-invest na og mga pinansyal aron lang makasunod sa programa.
Sa pagkakaron, ang Central Visayas adunay 81 porsyento nga rate sa compliance alang sa programa. Ang 19 porsyento nga nahabilin gilangkuban sa mga wala pa naka-enlist sa programa.
Si Reynaldo Elnar, chief transportation development officer, miingon nga mas daghan ang mga tradisyonal nga jeepneys nga nag-operate kumpara sa mga modernong jeepneys sa Central Visayas nga angay nga ilisan sa Disyembre 31, 2024.
Si Gregorio Tudtod, drayber sa LATransCo, nagpahayag sa iyang kalibog bahin sa gi-propose nga resolusyon, ug nanawagan kang Presidente Ferdinand Marcos Jr. nga lig-on nga suportahan ang PUVMP.
Miingon siya nga daghan ang mga drayber, konduktor, ug ilang mga pamilya nga maapektuhan sa temporary suspension.
“Nagkahiusa mi aning simultaneous rally para maabot sa taas nga ipahunong ang suspensyon sa modernization. Sila ra ang nagbuhat nya karon ila na sang ipahunong. Unsa man na, nag atras abante atong gobyerno. Proceed ta paras kalamboan sa Pilipinas,” ingon ni Tudtod.
Ang FCTC nanawagan sa nahabilin nga 19 porsyento nga unconsolidated jeepneys nga mosunod sa modernization program.
Ang grupo usab mipadala og letter of intent kang Marcos niadtong Agosto 1, 2024, uban ang paglaum nga si Marcos mag-revoke sa Senate resolution.
Niadtong Hulyo 30, 22 sa 23 ka mga senador ang mipirma sa Senate Resolution 1096, nga naghangyo kang Marcos nga temporaryo nga ihunong ang implementasyon sa PTMP samtang nagpaabot sa resolusyon sa mga valid ug urgent nga mga kabalaka nga gi-raise sa mga naapektuhan nga drayber ug mga operator.
Ang mga kabalaka nga ilang gipadangat mao ang impending phase-out sa iconic Philippine jeepneys pabor sa minibuses, ang abilidad sa mga drayber nga makapalit niini nga mga bag-ong sakyanan, ug ang daghang unconsolidated nga PUVs.
Si Transportation Secretary Jaime Bautista, sa usa ka sulat ngadto sa Senate President Francis “Chiz” Escudero, mipasalig nga ilang gipaningkamutan nga mahatagan og tubag o solusyon ang mga kabalaka bahin sa programa, nga nagpunting nga ang temporary suspension mahimong “muhunong sa positive momentum sa programa” ug mahimong moresulta sa “unintended consequences.”/SunStar Philippines