Mga 12 ka security guard sa real estate company sa Barangay Saavedra, Lungsod sa Moalboal, Sugbo ang gipamusil sa riding in tandem niadtong Lunes sa hapon, Agusto 5, 2024.
Sa 12, usa ang naigo ug nasamdan apan luwas ra sa makuyaw nga kahimtang.
Ang naangol nailhan lang sa pangalang Alfredo Jr., ulitawo, residente ra sa b sa maong dapit, kinsa nakaangkon og samad pinusilan sa iyang hawak.
Ang ubang mga kaubang guwardiya dali nga nakapasalipod ug nakatago sa dihang duha ka gunmen nga sakay sa motorsiklo namusil sa ilang nahimutangan.
Base sa pasiunang imbestigasyon sa Moalboal Police Station nga ang duha ka mga gunman sakay sa motorsiklo ug nailhan nga managsuon nga nagdala sa alyas nga London, 53, ug Sinoy, 43, taga-Barangay Manga, Lungsod sa Alcantara, Cebu.
Nasayran sa Superbalita Cebu nga nakadawat og tawag ang kapulisan nga giingong headquarters sa real estate ang girakrakan.
Padayon pa ang hot pursuit operations batok sa mga suspek ingon man ang imbestigasyon aron sa pagsuta sa motibo sa pagpamusil. Adunay pito ka kabhang sa bala ang nahipos sa kapulisan sa wa pa matino nga kalibre sa armas nga gigamit. / DVG