Gitigom sa Kapitolyo ang mga hepe sa district ug provincial hospitals niadtong Biyernes, July 25, 2025, aron matubag ang dugay nang problema sa public healthcare system sa Probinsya sa Sugbo.
Ang tigom nagtutok sa mga kakulangan sa suplay, kagamitan, ug serbisyo sa mga medical facility nga gipadagan sa probinsya.
Si Dr. Nicole “Doc Nikki” Catalan, Cebu Province health consultant maoy nangulo sa tigom ug nipalanog nga mas gipili ang pagtinabangay nga pamaagi sa mga reporma sa institusyon.
“On one hand, it’s encouraging that more people are starting to speak up. Before, many were afraid to file complaints or raise concerns. Now, we can see that people are recognizing the urgency of these issues and are calling for accountability — and that’s a good thing,” matod ni Catalan.
Atol sa tigom, gihatagan og panahon ang mga hepe sa hospital sa pagpadayag sa ilang tagsatagsa ka mga kabalaka, lakip na ang kakuwang sa kawani, sa saktong kagamitan, ug ang dinalian nga panginahanglan sa standard nga communication protocols tali sa lokal nga mga hospital ug sa Probinsya.
Si Dr. Eric Geyrozaga, hepe sa Argao District Hospital, nikompirmar sa kabalaka bahin sa kakuwang sa ilang kahimanan, apan ang ilang team nagpadayon sa pagtubag sa mga emerhensiya.
“We follow a protocol. Our first point of contact for transport is the RHU (Regional Health Unit). If they are unavailable, we then coordinate with the barangay. And if there’s still no available transport, then we handle it ourselves. That has never been a problem.” matod ni Geyrozaga .
Samtang, si Dr. Prudencio Manubag, hepe sa ospital sa Carcar City, nipasabot nga ang isyu dili mahitungod sa mga pasilidad mismo, apan sa kakuwang sa mga medikal nga propesyonal.
“We only have four OBs in the province. The problem isn’t the facility — the problem is the lack of doctors,” matod ni Manubag.
Gipasaligan sila ni Catalan nga ang ilang input makatabang sa pagmugna og dugay nga roadmap aron mapaayo ang operasyon sa mga pampublikong hospital sa Sugbo.
Gisubli niya ang pasalig sa Kapitolyo sa pagsiguro nga ang matag district hospital kabutangan og igong kawani aron makaserbisyo sa tagsatagsa nila ka komunidad.
Ang tigom nagtimaan sa pagsugod sa serye sa mga konsultasyon sa tibuok probinsya nga nagtumong sa pagpalambo sa kahimtang sa mga lokal nga serbisyo sa panglawas. /Jallee Haze Marimon, HNU Intern