Mga isda midagsa sa pier sa Argao, gipamunit

Argao.
Argao.Google Maps

Naalegre og makadiyot ang mga lumolupyo nga nanuroy ug nagpahangin sa pantalan sa Poblacion, Argao habagatang Sugbo sa mga alas 4 sa Huwebes sa hapon, Pebrero 29, 2024 sa dihang kalit lang nidagsa ang mga isda’ng malalangsi sa kilid sa pasilidad.

Kini ang gibutyag ni Glaiza Sarda Teo nga gikahinabi sa Superbalita Cebu nga didto atol sa hitabo.

Matod niya nga siya ug ang iyang bana nga si Jaylord nanuroy ug nihanggap og preskong hangin sa pantalan.

Sila nasurprisa sa dihang na­ka­kita sa mga isda nga ma­la­langsi nga nidagsa sa kilid sa pantalan nga naglukso-lukso.

Ang iyang bana ug ang uban pang mga tawo dali nga nikanaug sa ubos ug namunit sa mga isda nga nangasangit sa wall sa pantalan.

Nagpasalamat siya sa Ginoo sa maong grasya kay kalit kaayo ang hitabo ug wa nila damha.

Ang ilang napunit nga mga isda ilang gisu’d sa ilang u-box sa motorsiklo. Daghan ang mga nanghinaot nga mobalik ang mga isda aron daghan ang magrasyahan sa libreng sud-an kay mahal ang isda sa Argao.

Apan daghang mananagat, sama kang Jimmy Parantar, nagtuo nga ang mga isda gigukod sa dagkong mga isda nga motukob unta kanila hinungdan nga nadagsa na hinuon sa kilid sa pantalan.

Sa Pebrero, daghan sab nga mga isda ang gidagsa sa kabaybayunan sa habagatang Sugbo. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph