Moabot sa 10 ka mga dialysis unit ang ipahimutang sa mga isla sa Camotes ug Bantayan, amihanan sa Lalawigan sa Sugbo.
Gipahibawo sa Kapitolyo nga sa Marso inagurahan ang bag-ong hemodialysis centers sa maong mga dapit.
Nalakip sa mga hospital nga pamutangan og dialysis units ang Bantayan District Hospital sa isla sa Bantayan ug Ricardo Maningo Memorial Hospital sa mga isla sa Camotes.
Giingong ang maong mga kalambuan maoy makaabag sa paghatag og dugang access sa mga pasyente nga tabangunon ilabi na ang mga kabos nga residente sa isla.
Ang pagpahimutang sa pasilidad inabagan sa Medtronix Medical Supplies and Equipment.
Gawas sa maong mga hospital, padayon usab nga modawat og mga pasyente ang dialysis centers sa Balamban Provincial Hospital, Danao Provincial Hospital, ug Carcar Provincial Hospital, nga nag-operate na sa miaging tuig pa. / ANV