Nanghunaw ang Department of Social Welfare and Development (DSWD) 7 nga dili sila ang nibabag sa mga kawani sa City Social Welfare Services (CSWS) ug City Health Office (CHO) sa Mandaue City, nga buot mosulod sa venue diin gipahigayon ang pagtunold sa Assistance to Individuals in Crisis Situation (AICS) payout sa Barangay Banilad, Opao, ug Pagsabungan.
Giklaro sa DSWD 7 nga ang mga opisyal sa maong barangays maoy nibabag sa nahisgutang mga kawani.
Base sa opisyal nga pamahayag nga gipaagi og suwat nga gipadala sa DSWD 7 alang sa SunStar Cebu niadtong Biyernes, Abril 11, 2025, ang niklaro nga ang lokal nga kagamhanan sa Mandaue gipahibalo bahin sa gitakda nga payout ug sa pag-apil sa Konsulta program sa PhilHealth, nga maghatag og mga serbisyo medikal atol sa pag-apud-apod sa pinansyal nga ayuda.
Matod pa sa ahensya nga naghangyo sila sa Rural Health Unit (RHU) sa siyudad nga makigtambayayong sa focal person sa PhilHealth aron mohatag og medical services sa mga senior citizens samtang magpaabot.
“The DSWD did not deny entry to LGU personnel, rather, according to the report, it was due to instructions from the barangay,” matod sa pamahayag.
Samtang sa habig sa Mandaue City government pinaagi ni City Administrator Jamaal James Calipayan ang nipadayag og kabalaka kabahin sa nagbalikbalik nga mga insidente nga ang mga kawani sa CSWS ug CHO nga gibabagan sa pagsulod sa mga lugar sa AICS payout sa Barangays Banilad, Pagsabungan, ug Opao niadtong Abril 10 ug 11.
Pangutana ni Calipayan kon nganong ang mga kawani sa CSWS, nga anaa aron maghatag og logistical ug medikal nga suporta sa hangyo sa DSWD 7, apan wa tugoti sa pagsulod sa mga opisyal sa barangay.
HANGYO SA DSWD
Apan base sa suwat gikan sa DSWD 7 Regional Director Shalaine Marie Lucero nga gipitsahan niadtong Abril 2, nga gipadala ngadto kang Mayor Glenn Bercede ug CSWS Head Michael Allan Pielago, nga nagpahibawo nga nagkinahanglan ang departamento og abag atol sa mga payout.
Ang sulat nagpakita nga ang mga payout ipahigayon sa Abril 8, 10, ug 11 alang sa kinatibuk-an nga 2,343 ka mga benepisyaryo sa nagkadaiyang mga barangay sa Mandaue.
“Gipahibawo mi asa ang venue, sa mga barangay gyms, ug pila kabuok participants, unya gi-request ang atoang city health personnel through the Rural Health Unit to render assistance to protect the beneficiaries,” matod ni Calipayan.
Ang mga opisyal sa barangay nipasabot nga wala sila mahibalo unsay papel sa kagamhanan sa Dakbayan sa Mandaue.
Si konsehal Leo Saberon sa Banilad niingon sa unang pakighinabi nga ang ilang opisina wala makadawat og bisan unsang pahibawo gikan sa DSWD 7 bahin sa pag-apil sa mga kawani sa siyudad.
PAMOLITIKA?
Tungod sa hitabo, si Calipayan nagduda nga may kalabutan sa politika ang nahitabo.
“Klaro nga kini daw usa ka lihok sa politika. Ang atong mga kawani sa CSWS naghimo lang sa ilang katungdanan. Wala’y mga politiko nga nalambigit sa team, ug bisan pa niana, sila gibabagan,” matod niya.
Susamang insidente ang gitaho nga sa payout sa Maguikay ug Opao sa mga nilabay’ng adlaw, ang mga kawani sa city health ug DSWS gibabagan usab sa pagsulod.
Matod ni Calipayan nga makapasubo nga wa ilha sa mga barangay ang papel sa siyudad ning maong kalihukan.
Iyang gitataw nga ang DSWD 7 maoy nihangyo og tabang sa siyudad.
Tungod niini, ang DSWD 7 kasamtangan nga mosuspenso sa Konsulta program isip bahin sa kalihokan sa payout.