Sa post ni konsehal Joel Garganera sa iyang Facebook account, iyang gipakita ang hulagway sa duha ka mga lalaki nga giingong nisulod sa usa ka balay sa Banawa, Barangay Guadalupe, dakbayan sa Sugbo, alas 3 sa kaadlawon, Martes, Marso 5, 2024.
Nakuha sa maong mga lalaki ang upat ka mga cellular phone ug dali nga ningsibat pahilayo sa maong lugar.
Nag-viral usab ang laing CCTV footage nga gi post sa Facebook Account sa Barangay Apas diin gisulod usab sa nag binugtong nga kawatan ang usa ka panimalay sa Upper Don Bosco.
Wa masayri kung unsay nakuha sa kawatan apan nanawagan ang mga barangay official nga kung kinsa ang nakamay-ong sa dagway labing maayo nga mo report dayon sa kapulisan o ba kaha sa barangay hall.
Si Police Lieutenant Colonel Janette Rafter, deputy city director for operation sa Cebu City Police Office (CCPO), nagkanayon nga duna na silay identity sa nangawat sa Barangay Apas nga giingong molupyo ra usab sa maong barangay.
Sa Guadalupe, daghan na ang nanawag sa police station ug nipahibawo kinsa ang naa sa hulagway ug positibo si Rafter nga ila kini nga mailhan sa labing dali nga panahon.
“Naa nay nag-inform nga mao na ang name sa mga suspetsado pero ato usa na ipa verify,” matod ni Rafter.
Awhag lang ni Rafter sa publiko nga kung dunay makuha nga CCTV labot sa usa ka krimen labing maayo nga ihatag kini sa police station kung asa kini nahisakop aron mahatagan dayon nila og aksyon ug dili na makalayas ang mga responsable. / AYB