Giawhag sa Department of Education (DepEd) niadtong Miyerkules, Agusto 5, 2026, ang mga magtutudlo nga kanunay’ng bantayan ang ilang mga estudyante sa posible nga mga timailhan sa pag-usab sa batasan niini subay sa natala nga mga bayolenteng insidente nga gikalambigitan sa mga tunghaan—sa sulod man o sa gawas.
Sa usa ka pakighinabi, gisaysay ni DepEd Secretary Sonny Angara nga kinahanglan nga hatagan og seryosong pagtagad sa mga magtutudlo ang mga kausaban sa gawi sa ilang mga estudyante, samtang giila sab niya ang kakuwang sa mga guidance counselor sa mga tunghaan.
Usa sa mga timailhan nga kinahanglang bantayan kon ang bata magsige na og absent, mogamay ang grado, og dili makig-istorya sa iyang mga klasmeyt.
Subay sa labing bag-ong datos sa DepEd, aduna pay kapin sa 4,000 ka bakanteng posisyon alang sa mga guidance counselor ug guidance coordinator sa mga pampublikong tunghaan.
Gipadayag ni Angara nga ang ahensiya nagkuha karon ug mga 10,000 ka student counselor associates nga nakatapos ug mga units sa psychology o behavioral science, subay sa Republic Act 11036, o ang Philippine Mental Health Act. Kini nga mga posisyon di na kinahanglan og propesyonal nga lisensya.
Sa laing bahin, sa usa ka bulag nga pakighinabi, gipahibalo ni Angara nga ang Philippine National Police ug ang Department of the Interior and Local Government nipadayag sa ilang komitment nga pahugtan ang pagpatrolya sa palibot sa mga tunghaan.
Matod sab niya nga ang DepEd nagproseso na sa pagpalit og mga metal detector aron ipang-apudapod sa mga tunghaan.
Kaniadtong Hunyo, tulo ka estudyante ang nangamatay ug 20 ang naangol sa usa ka pagpamusil nga gihimo sa duha ka estudyante sa sulod sa San Jose National High School sa Tacloban City. Usa pa ka insidente ang nahitabo sa usa ka pribadong tunghaan sa General Trias, Cavite diin pito ka estudyante ang nasamdan sa pagpanunggab.
Niadtong miaging semana, usa ka 13-anyos nga estudyante sa Las Piñas National High School ang namatay human gidunggab sa iyang klasmeyt. /TPM/SunStar Philippines