Dalaga nga nag-shopping og mahalong bino nga wa mobayad, nasakpan ug gipusasan sa guwardiya sa usa ka mall sa Brgy. Poblacion Ward ll, lungsod sa Minglanilla, alas 8:30 sa gabii, Huwebes, Nobiyembre 30, 2023.
Ang suspek giila nga si Shelanne Ejada Savequilla, 29, taga Lower Malibu, Barangay Subangdaku, dakbayan sa Mandaue.
Sa imbestigasyon ni Police Captain Kalvin Jomari Golitod, hepe sa Minglanilla Police Station, gikuha sa suspek ang mga mahalong bino nga baligya grocery store sa mall.
Kini naglakip sa duha ka Johnny Walker Black Label, 5 ka Double Black Label, ug usa ka Gold Label nga mobalor tanan og P14,000.
Nabantayan nga wa moagi ang suspek sa cashier ug nagdali sa paggawas apan nabatayan sa guwardiya ang iyang mga linihukan hinungdan nga daling gisignit.
Sa pagsusi sa mga gwardiya sa bag sa maong babaye, nakita ang mga mahalong klase sa bino nga gisulod niini.