Gisugdan na sa duha ka mga manghod ni Filipino gymnastics superstar Carlos “Caloy” Yulo ang seryuso nilang training alang sa ilang tinguha nga maka-qualify sa 2028 Los Angeles Olympics.
Dili pa lang dugay, sila si Eldrew ug Elaiza ninglarga sa Japan aron mag-training ubos sa paggiya sa Japanese coach sa ilang maguwang nga si Munehiro Kugimiya.
Ang inahan sa mga Yulo nga si Angelica maoy nikompirmar ning maong kalambuan basi sa taho sa GMA Integrated News.
Sa sayo pa, si Gymnastics Association of the Philippines (GAP) president Cynthia Carrion nibutyag na’ng daan sa ilang plano nga ilakip si Eldrew sa PH team lineup alang sa 2028 LA Games.
Ubay-ubay na sab nga mga medalya ang nahipos ni Eldrew sa nagkadaiyang national multi-sport events samtang si Elaiza nakalabni og lima ka gold medals sa niaging Palarong Pambansa.
Nanghinaot sila si Eldrew ug Elaiza nga makasunod sa lakang Caloy, kinsa nakalabni og duha ka gold medals sa niaging Paris Olympics. / ESL