Mga milapas sa easement zone sa Estero de Parian ipaguba

GIBUNGKAG: Giguba na sa Task Force Gubat sa Baha Lunes, Mayo 6, 2024, ang paril sa Tinago Barangay Hall human sa 72 ka oras nga lugway sa paglapas three meters easement gikan sa sapa sa Arellano boulevard, Cebu City.  /
GIBUNGKAG: Giguba na sa Task Force Gubat sa Baha Lunes, Mayo 6, 2024, ang paril sa Tinago Barangay Hall human sa 72 ka oras nga lugway sa paglapas three meters easement gikan sa sapa sa Arellano boulevard, Cebu City. / AMPER CAMPAÑA

Di mominos 10 ka mga establisemento nga makit­-an sa habig sa Estero de Parian, nga nakalapas sa three-meter easement zone, giisyuhan og cease and desist order sa Cebu City Go­vernment pinaagi sa Business Permit and Licensing Office.

Matud ni Task Force Gubat sa Baha Chief Implementer Melquiades Feliciano, niadtong Lunes, Mayo 6, 2024, sa 34 ka mga establisemento nga na-notify, kining 10 wala nituman sa notice nga gi-issue sa City Government.

Ang Estero de Parian nagsu­bay sa Barangay Parian, San Roque, Sto. Niño ug Tinago.

Matod niya nga kining giila nga 10 ka mga establisemento makadawat og cease and desist order human wala motubag sa 72-hour final notice nga ilang gi-apud-apod niadtong Abril 22.

Hinuon, wala pa ibutyag ni Feliciano ang mga ngalan sa mga nalambigit nga establisemento.

Dugang pa, iyang giklaro nga ang kamandoan wala magsulti sa mga establisemento nga mag-clear tungod kay ang cease and desist nagmando lamang kanila sa pag­hunong sa operasyon.

Matod ni Feliciano, ang ubang mga establisemento res­ponsive na apan lainlain ang kahimtang.

Gidugang niya nga duha ka establisemento ang nakadawat og clearing order, lima ang nagpaabot pa og technical report gikan sa Department of Engineering and Public Works, ug unom niini ang boluntaryong mituman. Ang uban gi-follow-up pa.

Sa laing bahin, si Feliciano niingon nga sugdan na usab nila ang pagpadala og mga notisya sa ubang mga estraktura nga makit-an nga makalapas sa ubang mga agianan sa tu­big nga nahimutang sa Siyudad aron higpit nga ipahamtang ang three-meter easement zone. Hinuon, wala niya gitumbok kon kanus-a sila magsugod.

Niadtong Abril 30, ang SunStar Cebu mitaho nga si Feliciano niingon nga kini nga mga notisya ug clearing operations padayon nga paningkamot sa City Government aron mabawi ang three-meter easement sa Estero de Parian.

Sigon niya ang Presidential Decree 1067 o ang Water Code of the Philippines nagmando sa tulo ka metros nga mga sona gikan sa mga suba o agianan sa tubig sa mga siyudad isip “no build zones."

Si Cebu City Mayor Michael Rama sa pakighinabi niadtong Lunes nipahimangno sa tanang mga establisemento nga makit-an sa habig sa Estero de Parian, kinahanglang motuman sa mga abiso ug boluntaryong moguba sa ilang mga estraktura.

“Kining tanan para sa mga batan-ong henerasyon. Kung dili karon, kanus-a pa? Kung dili kita, nan kinsa?,” ingon niya.

Si Rama niingon nga higpit nilang ipatuman kining environmental protection policy, dili lang sa Estero de Parian apil na sa ubang suba sa dakbayan, ug niingon nga na­ngandam na sila sa umaabot nga ting-ulan nga posibleng makamugna og dakong pagbaha sa dakbayan. / KJF

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph