Gihatagan og tagal kutob Dominggo, Agusto 17, 2025 ni Dumanjug Mayor Gungun Gica ang mga konstituente niini nga nalambigit sa ilegal nga drugas sa boluntaryong pag-surrender ug pagpahibawo sa tagsa-tagsa niini ka mga barangay kapitan.
Kini paagi sa mayor aron masumpo ang pagkatap sa ilegal nga drugas ug krimen sa lungsod.
Atol sa gipatawag nga tigom sa tanang 37 ka mga barangay kapitan lakip ang Dumanjug Police sa Agusto 14, giawhag ni Gica ang kanhi ug kasamtangan nga mga drug pusher, mga tiggamitan, ug mga kawatan nga mo-surrender.
“Dili nako gusto nga himuon ang mga tawo nga ni-surrender kaniadto sa tokhang nga para compliance lang aron naay madakpan. Mas dako natong kalipay kung kita ang pinakaulahi nga police station tungod kay wala nay madakpan tungod wala nay nagbaligya ug mogamit sa ginadiling drugas, wala nay tulisan, wala nay patay o krimen sa Dumanjug,” matod ni Gica. / ANV
