Gipangita sa Cebu City Police Office (CCPO) ang mga responsable sa rambol sa usa ka imnanan sa Brgy. Lahug, dakbayan sa Sugbo sa Sabado sa gabii, Marso 23, 2024.
Ang kagubot nakuhaan kini’g video sa usa ka lalaki nga gi upload sa social media hinungdan nga kini nag viral.
Matod ni Police Lt. Colonel Janette Rafter, deputy city director for operations sa CCPO, nga nangita na sila og pamaagi nga ilang mailhan kinsa ang maong mga batan-on nga nagrambol.
Base sa kuha sa video, maklaro ang mga panagway sa nangalambigit.
Makita ang duha ka mga lalaki nga nagsul-ob og senina nga puwa ug laing duha pa ka mga lalaki nga nakaputi ug gray nga t-shirt nga nagsukmagay.
Niawhag si Rafter sa publiko sa mga nakaila niining maong mga batan-on nga gihulagway nga pulos na hubog nga mo-report sa police station aron ilhon.
Tumong niini, sigun ni Rafter, nga mahatagan og leksyon ang si bisan kinsa nga maghimo’g kagubot pinaagi sa pagkiha kanila og alarm and scandal.
Nipahibawo na kaniadto si Police Colonel Ireneo Dalogdog, hepe sa CCPO, nga ila nga pasakaan og kaso ang maghimo’g kagubot.
“Ato gyud ni sila patubagon sa pag cause nila og disorder ug kanang pag threat sa security sa mga tawo niadtong establisemento”, matod ni Rafter.
Sa miaging semana, nagsunodsunod ang rambol sa mga imnanan nga niresulta pa sa pagpamusil diin duha ka mga kinabuhi ang nakalas. / AYB