Opisyal na nga molingkod sa ilang posisyon ang mga bag-o, reelected, ug nahibalik nga local chief executives sa tibuok Probinsya sa Sugbo karong Lunes, Hunyo 30, 2025.
Sa tulo ka Highly Urbanized Cities (HUCs) sa probinsya, ang bag-ong mga mayor ang mangulo sa ilang mga konstituwente sa mosunod nga tulo ka mga tuig.
Si Konsehal Nestor Archival maoy molingkod isip bag-ong mayor sa Cebu City human niya gilupig ang incumbent nga si Raymond Alvin Garcia, pag-umangkon sa napildi nga si Cebu Governor Gwendolyn Garcia.
Si Mayor Garcia nagtinguha unta sa iyang unang termino isip usa ka napiling mayor human siya nilingkod sa katungdanan isip puli sa gisuspenso nga mayor nga si Michael Rama niadtong Oktubre, 2024.
Sa Mandaue City, si Cebu Sixth District Provincial Board Member Thadeo Jovito Ouano ang nakadaog sa pagka-mayor batok kang Jonas Cortes, kinsa nagtinguha unta sa iyang ikatulo nga sunodsunod nga termino ug ikaunom sa kinatibuk-an.
Sa Lapu-Lapu City, ang incumbent nga Lone District Rep. Cynthia King-Chan maoy bag-ong mayor ug nipuli sa iyang bana, si outgoing Mayor Junard Chan, kinsa nagserbisyo gikan niadtong 2019.
Usa ka dakong kausaban sa politika sa probinsya ang masaksihan human sa surpresang kadaugan sa bag-o pa lang sa politika nga si Pamela Baricuatro batok ni Gobernador Garcia, kinsa nangita unta sa iyang ikatulo nga sunodsunod nga termino ug ug ikaunom nga kinatibuk-an.
Si Gobernador Garcia napili isip Cebu Governor niadtong 2004 hangtod 2010, nakadaog isip Cebu Third District Congressional Representative niadtong 2013 ug 2016, ug nibalik isip Gobernador niadtong 2019.
Si Baricuatro, kinsa giendorso ni kanhi Presidente Rodrigo Duterte, nakahakot og 1,107,924 ka mga boto kumpara sa 765,051 nga nakuha ni Garcia, kinsa adunay suporta ni Presidente Ferdinand Marcos Jr.
Bisan pa sa kausaban sa kinatas-ang posisyon sa probinsya, ang mga reelectionist maoy naghari sa 2025 midterm election. / EHP