Dul-an sa 44 ka pamilya ang gipabakwit sa Ibabao-Estancia gym niadtong Biyernes, Hunyo 6, 2025 human sa kusog nga uwan nga maoy hinungdan sa lawom nga baha nga miabot sa hawak sa pipila ka barangay sa Dakbayan sa Mandaue.
Ang mga lupa nga mga barangay mao ang gipangbahaan sama sa Ibabao-Estancia, Tipolo, Cabancalan, Pagsabungan, ug Subangdaku, sumala sa City Disaster Risk Reduction and Management Office (CDRRMO).
Si Buddy Ybañez, pangulo sa CDRRMO, nagkanayon sa usa ka interview sa SunStar Cebu nga ang pagbakwit gihimo isip usa ka precautionary measure aron masiguro ang kaluwasan sa mga residente, ilabi na kadtong nagpuyo duol sa mga sapa ug dapit nga dili maayo ang drainage.
Bisan pa sa gilapdon sa baha, walay gikataho nga naangol o namatay.
Ang tubig-baha miabot hangtod sa hawak sa pipila ka lugar, nga nitabon sa mga dalan, balay, ug negosyo.
Ang mga emergency response team gikan sa disaster office sa siyudad ug mga unit sa barangay daling gi-deploy aron pagtabang sa mga apektadong pamilya ug pagpahigayon sa ilang pagbakwit.
Ang Barangay Ibabao-Estancia, usa sa labing daling gibahaan nga dapit sa siyudad, tungod kay duol ni sa usa ka sapa nga kanunay moawas panahon sa dugay nga pag-ulan.
Ug kon mobaha, ang dan di na maagian sa mga motorista, ug daghang sakyanan ang ma-stranded ug di makadagan.
Matod ni Ybañez, bisan og adunay drainage system ang barangay mas nigrabe ang baha tungod kay barado ang mga agianan sa tubig.
“Ang barangay dunay drainage system, pero barado na sa basura. Modaghan gyud ang tubig, ug tungod kay dunay sapa sa duol, mas mograbe pa ang baha,” matod niya.
Gibutyag usab niya nga bisan og kanunayng magpahigayon og drainage cleanups ug desilting operations ang siyudad, mabaliwala lang ang tanan tungod sa kakuwang sa disiplina sa publiko nga pataka lang og labay sa basura.
“Ang kasagarang hinungdan sa baha mao ang pagtapok sa basura sa mga kanal. Bisan og nalimpyohan ug na-desilt na sa siyudad ang mga drainage, ang pagpabaya sa katawhan nagpabilin nga isyu,” matod niya.
Ang mga pamilya nga gipabakwit sa Ibabao-Estancia gym, makadawat og dinalian nga tabang gikan sa City Social Welfare Services (CSWS).
Gipanghatagan sila og relief goods ug temporaryong kabakwitan, ug daghan kanila ang way naluwas sa ilang mga butang gikan sa nagsaka nga tubig.
Gipahibalo sa mga personnel sa CSWS ang mga pamilya nga makabalik sila sa ilang balay kon mohubas na ang tubig-baha ug kon luwas na ang kahimtang.
Pagka-Sabado sa buntag, pipila ka gipabakwit ang nagsugod na sa pagbalik sa ilang pinuy-anan, samtang ang uban nagpabilin sa gym, nagpaabot nga moarang-arang ang kahimtang. / CAV