Gihaya na sa ilang balay sa Sityo Tipuso, Barangay Bulasa, Lungsod sa Argao, Sugbo ang saleslady nga gipatay sud sa giabangan nga lawak sa Brgy. Bulacao, Dakbayan sa Sugbo, Biyernes, Agusto 2, 2024.
Naputol ang tanang pangandoy sa biktima nga si Charina Relativo, 27, saleslady sa usa ka mall sa dakbayan.
Nahinabi sa Superbalita Cebu ang ginikanan ni Charina nga sila si Loreto ug Leticia Relativo nga bugtong gipanawagan nga makab-ot ang hustisya sa gidangatan sa ilang anak.
Sigun pa ni Ginang Leticia nga daghan pa unta og plano ang iyang anak dili lang sa iyang kaugalingon apan sa ilang pamilya.
Si Charina maoy ikaduha sa tulo ka mga managsuon.
Saysay sa inahan nga kasamtangan nga nanarbaho si Charina sa mall samtang nagpaabot sa iyang agency nga iyang giaplayan og trabaho alang sa abroad.
Manimpalad unta si Charina ngadto sa Hong Kong aron nga makapahuman sa pagtukod sa ilang balay ingon man makatabang sa pagpatungha sa iyang manghod sa kolehiyo.
Katapusan nga gika-chat ni Leticia ang iyang anak pinaagi sa Messenger niadtong Huwebes sa gabii, Agusto 1, 2024 nga malipayon pa kaayo ug nisaad nga mopauli sa Barili sa Sabado aron pagtambong unta sa haya ug lubong sa iyang ninang sa bunyag.
Na-emosyonal ang inahan nga nagsud-ong sa lungon nga sa pagpauli sa iyang anak gisulod na sa kahon.
Samtang ang kapulisan sa Inayawan Police Station nagpadayon sa ilang operasyon sa pagsuwat ning taho batok sa suspek sa pagpatay. / DVG