SAMTANG nag-andam ang Dakbayan sa Sugbo sa city wide Clean-Up Drive karong Sabado, Hunyo 21, 2025, nagplano na si Ma-yor-elect Nestor Archival sa posibilidad sa angayang buhaton ngadto sa nagtipun-og nga plastik nga makolekta human sa maong kalihukan.
Nakita ni Archival nga minusan ang maong basura, iyang gilaraw nga mohimo og solusyon nga molungtad og dugay ug siya nisugyot nga ibaligya ang mga plastik ngadto sa mga pabrika nga makahimo og pamaagi sa pag-convert niini ngadto sa lana o fuel.
“We must find companies kung kinsay atong matagaan sa plastics nga atong ibaligya,” matod ni Archival atol sa interbyu niadtong Martes, Hunyo 17, 2025.
Ang maong proposal nagpakita sa adbokasiya ni Archival nga mohimo og mga inisyatibo aron nga kapanalipdan ang kinaiyahan pinaagi sa iyang mga eco-friendly nga palisiya.
Lakip sa iyang mga gipaningkamutan mao ang hugot nga kampanya sa waste segregation, suporta sa sustainable transport systems, ug pagpasiugda sa paggamit sa renewable energy.
Base sa hulagway, natabunan sa daghang basura ang baba-an sa Guadalupe river, Barangay Pasil Cebu City diin usa ka tawo ang nanguykoy og basura nga plastic nga iyang mabaligya. /Jeanette Aringue, HNU Intern/ Juan Carlo de Vela