Gipahibalo sa Philippine National Police (PNP) nga ilang sirad-an ang mga police box ug police community precincts (PCPs) ilabi na sa Metro Manila samtang gipatuman ang paggamit sa publiko sa 911 emergency response hotline.
Sa usa ka press conference niadtong Miyerkules, Hunyo 4, 2025, si PNP chief General Nicolas Torre III niingon nga dili na kinahanglan ang mga police box ug PCPs tungod kay mahimo na man nga manawag ang publiko alang sa police response pinaagi sa ilang mga mobile phone.
“We will see na may mga police boxes at PCPs na isasarado because kung wala rin lang imbestigasyon diyan sa mga police boxes at saka sa mga precincts, I would rather have our policemen walk their beats, pound the streets. Sakay sa patrol car, dala ng radio,” si Torre niingon.
“Huwag ninyo na hanapin ang mga pulis sa presinto sapagkat kami ay nasa inyo na mga telepono. Dial 911, darating kami sa loob ng limang minuto. Yan ang aming pangako, gagawin namin yan,” siya nidugang.
Matod ni Torre nga tumong nila karon nga mapaubos ang response time sa kapulisan gikan sa lima ka minuto ngadto sa tulo ka minuto sa umaabot nga mga bulan.
Sigon pa niya nga gimanduan na niya ang mga regional police commander nga ipatuman ang lima ka minutong emergency response sa ilang tagsa-tagsa ka hurisdiksyon.
Gimanduan sab sa hepe sa kapulisan ang tanang yunit nga mohimo og detalyado nga imbentaryo ug assessment sa functionality sa ilang mga radyo ug uban pang importanteng kagamitan.
Gimanduan niya ang mga field commander nga pahimuslan ang pagdeploy ug paggamit sa tanang patrol vehicle aron mapataas ang visibility ug coverage sa kapulisan sa mga komunidad.
Sugod karong Miyerkules, ipatuman sa PNP ang otso oras nga duty alang sa mga police personnel aron masiguro ang kalidad sa ilang trabaho. / TPM / SunStar Philippines