Samtang unom na lang ka adlaw ang nahabilin sa dili pa ang 2025 national ug local elections (NLE), si Philippine National Police (PNP) Chief General Rommel Marbil nipahinumdom sa tanang police personnel nga magpabiling neutral sa politika ug motutok sa ilang trabaho aron mamintinar ang kalinaw ug kahapsay atol sa piniliay.
Sa usa ka pahayag, gisubli ni Marbil ang core mission sa PNP atol sa eleksyon nga mao ang pagseguro sa kaluwasan sa publiko ug pagmintinar sa political neutrality aron maprotektahan ang demokrasya ug dili magsilbi sa personal nga politikanhong interes.
Gihimo niya ang pahayag taliwala sab sa nagkadako nga kabalaka sa publiko bahin sa giingon nga mga kaso sa partisanship sa pipila ka mga uniformed personnel.
Matod ni Marbil nga bisan kinsa nga opisyal sa pulisya nga makit-an nga nag-apilapil sa mga kalihukan sa politika mag-atubang og administrative ug disciplinary action nga mahimong moresulta sa pagkatangtang sa serbisyo.
“Let me be clear: the PNP will not tolerate any form of political partisanship within its ranks. The uniform we wear represents public service – not any political campaign or candidacy,” matod ni Marbil.
“Our communities rely on us to make sure their voices are heard in a safe and secure environment. That is our solemn duty,” dugang niya.
Nanawagan sab ang labing taas nga opisyal sa PNP sa tanang unit commanders ug regional directors nga aktibong mag-monitor sa ilang mga personnel ug i-report ang bisan unsang timailhan sa pagkalambigit sa politika.
“Our accountability as officers does not end with deployment. We are expected to uphold the non-partisan mandate of the PNP at all times. Our integrity as an institution depends on our collective ability to remain above politics. We must never allow personal or class ties to compromise our impartiality,” sumala ni Marbil.
Gipasalig ni Marbil sa publiko nga magpabilin silang lig-on nga magbalantay sa demokrasya ug dedikado sa paghatod sa malinawon, hapsay, ug matinud-anon nga proseso sa eleksyon. / TPM / SunStar Philippines