Giingong kakuwang sa pormal nga pahibawo alang sa gikatakdang demolisyon ug nauna nga alegasyon nga hulga sa kinabuhi sa mga lider nga nakapasamot sa tensiyon sa mga molupyo sa Sitio Iba, Barangay Lawaan II, Dakbayan sa Talisay, Lalawigan sa Sugbo.
Naalarma ang mga molupyo human nangabot ang demolition team nga gibanabanang 50 ka mga personahe nga walay pasidaan, matod ni Imelda Sigue, residente sa maong dapit nga nagpuyo sulod na sa 50 ka tuig.
Ang lugar adunay mga 300 ka mga residente nga nagpuyo sa usa ka ektarya.
Matod ni Sigue nga naalarma ang mga residente sa wala damhang pag-abot sa grupo nga nagdala og mga himan alang sa demolisyon.
Ang pag-abot sa demolition team dugang nga nakapahagit sa mga residente kinsa nag-ingon nga wala sila gipahibalo sa husto sa aksiyon.
Si Sigue niingon nga alerto sila sukad pa niadtong milabay nga mga adlaw nunot sa giingong mga hulga sa kinabuhi batok kaniya ug sa laing tulo ka mga lider sa Sitio Iba.
Kini nga mga hulga, ingon niya, nagsunod sa mga pangutana nga gihimo sa usa ka wala mailhi nga tawo bahin sa upat ka mga lider apan wala kini maghisgot og mga ngalan.
Sa laing bahin, ang Presidente sa Aulan Residents Multipurpose association for progress incorporated Risa Amahan niingon nga nagkita na sila ni Talisay City Mayor Samsam Gullas sa buntag ug naghisgot bahin sa isyu.
Apan wala na gidetalye ni Amahan ang ilang panag-estorya tali sa mayor.
Matod ni Amahan nga pasakaan og kaso sa asosasyon ang mga claimant sa lote. / CDF