Ang Cebu City Government ma-busy sa mosunod nga unom ka mga buwan samtang nangandam alang sa Palarong Pambansa 2024, nga ipahigayon sa Hulyo.
Kini, tungod kay ang memorandum of agreement (MOA) nga naglatid sa mga responsibilidad sa Siyudad ug sa Department of Education (DepEd) alang sa kalihukan gisumite ngadto sa Sangguniang Panlungsod.
Giaprobahan sa Konseho atol sa regular session niini niadtong Miyerkules, Enero 10, 2024, ang resolusyon ni City Councilor Donaldo Hontiveros nga nagtugot kang Mayor Michael Rama sa pagpirma sa MOA uban sa DepEd.
Ang Dakbayan sa Sugbo napili nga mo-host sa Palarong Pambansa 2024, ang labing dako nga sporting event sa nasod alang sa mga student-athletes, human makadaog sa bid niadtong Agusto 2023.
Uban niini mao ang daghang mga obligasyon sama sa pagpangita og pundo alang sa mga galastuhan; pagsiguro sa kaandam ug matagan-an og mga pasilidad sa sports, mga lugar, billeting quarter sa mga estudyante nga atleta ug mga supporting staff; ug pagtuman sa ubang mga kinahanglanon sa imprastraktura.
Sukad niadtong Mayo, gisirad-an sa Siyudad ang Cebu City Sports Center ngadto sa publiko aron mahatagan og dalan ang mga renovation ug improvement works aron maandam na kini sa maong kalihukan.
Matod sa MOA, kinahanglan usab nga sigurohon sa City Government nga ang mga teknikal nga pasilidad, kahimanan ug materyales nga gamiton sa mga dula adunay international standards.
Ang mga lugar nga pahigayunan sa sposrts, lakip ang mga grandstand, bleachers ug mga lugar alang sa mga manan-aw, kinahanglan nga luwas ug binantayan kaayo, dali ma-access ug libre sa kadaghanan sa publiko nga manan-aw.
Alang sa billeting quarters sa tanang regional athletic delegations ug technical officials, ang Siyudad kinahanglang mohatag og labing menos usa ka lawak alang sa matag 10 ka miyembro sa delegasyon o labing menos 70 ka lawak-klasehanan sa matag delegasyon.
Ang lawak kinahanglan adunay screened nga mga bintana aron mapanalipdan ang mga miyembro sa delegasyon batok sa bisan unsang kadaot nga dala sa mga lamok, ug uban pang mga insekto.
Ang billeting quarters kinahanglang adunay walay hunong, limpyo, ug igong suplay sa tubig ug kuryente.
Ang Siyudad usab ang modumala sa paghatag sa tanang tropeyo ug medalya sa tanang sporting events, samtang ang Palaro board mahimo usab nga mohatag og cash incentives sa mga atleta o coach, depende sa anaa sa pundo.
Ang Siyudad usab ang modumala sa paghatag og mga sakyanan nga magdala sa mga delegado sa ilang gipuy-an.
Naglakip kini sa mga bus nga maghatod kanila gikan sa tugpahanan o mga pantalan, ug sa pagdala kanila padulong ug gikan sa mga lugar nga dulaanan.