Sugdan na sa Land Transportation Office (LTO) ang pagpanakop sa mga sakyanan nga naggamit og temporaryo o improvised nga plaka sunod semana.
Ang mga makalapas mag-atubang og multa nga P5,000, ingon man isyuhan og Temporary Operator’s Permit (TOP).
Gipahinumdoman ni LTO 7 Director Glen Galario ang mga motorista ilabi na kadtong mga sakyanan nga narehistro sa tuig 2017 ug paubos nga kuhaon ang ilang opisyal nga license plates aron dili madakpan.
Matod niya sa usa ka interbyu niadtong Martes, Agusto 5, 2025, nga nagsugod na sa pagdagsa ang mga mokuha og plaka sa mga buhatan sa LTO tungod kay gipaspasan na sa ahensiya ang pagpanghatag.
Sa pagkakaron, mokabat sa 160,000 ka license plates ang nahatod na sa Rehiyon 7 gikan sa 590,000 nga kinatibuk-an.
Apan matod ni Galario, dili makahatag og eksaktong ihap ang ahensiya kon pila na ang na-release tungod kay uban giapudapod pinaagi sa mga dealers.
Gipasabot sab ni Galario nga usa sa mga nag-unang rason sa pagkalangan sa pagkuha og plaka mao ang dili kompleto nga dokumento labi na sa mga tag-iya sa second-hand nga mga sakyanan.
Para sa mga wala pa opisyal nga nakabalhin sa pagpanag-iya, kinahanglan nilang mopresentar og photocopy sa Certificate of Registration (CR), Official Receipt (OR), balido nga IDs sa vendor ug vendee, ug usa ka notarized nga Deed of Sale.
Matod ni Galario, ang hugot nga pagpatuman sa “No Plate, No Travel” policy kabahin kini sa tinguha sa ahensiya nga mawagtang ang tanang backlogs sa wala pa ang Oktubre 31 nga deadline. / CAV