Human gi-merge ang Sugboanon Channel sa Public Information Office (PIO) sa kagamhanan sa Dakbayan sa Sugbo, daghan ang nagtinguha nga kuhaon nila ang ilang audio-visual (AV) nga mga ekipo nga gigamit sa kanhi broadcast arm.
Ang maong sibyaanan nipost sa social media mahitungod sa ilang pagsign-off sugod niadtong Pebrero 9.
Kining maong mga kagamitan nga mokantidad sa dili mominos P600 mil naglakip sa duha ka laptop nga Aspire 7 ug Legion 5 Pro, usa ka AVMatrix VS061U Mini Multi-Format video switcher, usa ka Rode wireless Go II Dual Channel microphone system, usa ka Sony PXW-Z90V video camera, usa ka Zoom H6 Handy audio recorder, usa ka Yamaha MGP 24x24 audio mixer, usa ka set sa desktop PC nga adunay high-performing specification para sa studio ug pag-edit ug portable hard drive gibutang sa Sugboanon Channel studio nga temporaryong gi-padlock alang sa imbentaryo.
Matod ni Ramil Ayuman, hepe sa Cebu City PIO nga nahinabi sa SunStar Cebu niadtong Miyerkules, Pebrero 19, nga ang Cebu City Government nakadawat og sulat gikan ni Lawyer Mikel Rama, anak ni kanhi Mayor Rama, naghangyo sa pag-recall niining pipila ka mga ekipo nga “gipahulam” sa Sugboanon Channel alang sa broadcast purposes niadtong Agusto 2023.
Ang sulat pinetsahan og Pebrero 10, 2025, gitumong ngadto kang Cerwin Eviota, executive director sa Sugboanon Channel.
Samtang si Mayor Raymond Alvin Garcia nakadawat usab og sulat pinetsahan og Pebrero 4 gikan sa pribadong supplier nga ginganlag BMH System Solution Inc.
Sumala sa sulat sa BMH, ang mga kagamitan gipahulam sa Sugboanon Channel kaniadtong Disyembre 2023.
Si Ayuman niingon nga ang pangulo sa Department of General Services nangayog opinyon sa City Legal Office kon unsaon ang maong mga kagamitan.
Ang Sugboanon Channel giusa ni Mayor Garcia sa PIO,tungod kay naghinubra ang tawo.
Ang Sugboanon Channel natukod ubos sa administrasyon ni Rama niadtong Agusto 14, 2023, isip plataporma sa impormasyon nga independente sa PIO. / EHP