Nahimangod og maayo ang usa ka small time nga negusyante og buy and sell kay ang gi-deliver kaniya sa iyang online order di cellphone, kon di botelya nga plastik sa softdrink nga ang sulod tubig.
Gipakapinan pa og usa ka lata sa beef loaf.
Mao kini ang unang higayon nga nasinati ni Mark Rizon, taga Brgy. Langtad, Argao, kinsa niasoy sa Superbalita Cebu sa nahitabo kaniya niadtong Biyernes Santo, Marso 29, 2024 human sa pipila ka tuig na niyang mang-order online og gadget nga iya usab nga ibaligya.
Si Rizon niasoy nga ang delivery sa cellphone nga iyang gi-order sa usa ka seller agi sa Lazada niadto untang Marso 27, 2024, apan sa Biyernes Santo na nahatod kaniya.
Gikan siya nitambong sa Siete Palabras dihang gihatod ang item.
Dihang iya nang gibuksan ang box nga niabot kaniya, nakurat siya kay botelya sa softdrink ang sulod nga dunay tubig ug giparesan og beef loaf, di ang iyang gi-order nga cellphone. Ang shipment iyang gibayran og P5,000.
Matod ni Rizon nga niadto pang 2020 nga panahon sa pandemic siya nagsugod sa pagpamalit og cellphone online agi sa Lazada ug karon pa siya nakasinati niini.
Hinuon, duna siyay proof sa di mao nga delivery pinaagi sa pagkuha og video niini.
Nagtuo siya nga way labot ang Lazada niini, kon di ang delivery partner. Nanghinaut siya nga mo-refund ang Lazada niini. /