Nakagawas sa prisuhan tungod sa plea bargain sa kasong paghupot og illegal drugs nadakpan og balik sa buy-bust sa Purok 6, Barangay Cogon, dakbayan sa Tagbilaran, alas 10:40 sa gabii, Martes, Abril 16, 2024.
Nasikop sa hiniusang operasyon sa Philippine Drug Enforcement Agency (PDEA 7), Bohol Police Provincial Office (BPPO) inabagan sa Tagbilaran City Police Station giila nga si Chris Ipanag, 45, freelance layout designer, nagpuyo sa maong lugar.
Nakuha sa mga operatiba ang 16 ka dagkong putos sa gituohang shabu nga dunay gibug-aton nga 755 gramos nga dunay estimated market value nga P5,270,000, buy-bust money, motorsiklo, ug cellphone niini.
Matod ni Leia Alcantara, information officer sa PDEA-7, nga moabot sa usa ka semana nga gipaubos sa case buildup ang suspek human nila nadawat ang impormasyon.
Base sa nakuha nga impormasyon, makabaligya ang suspek og 500 gramos ngadto sa usa ka kilo matag semana.
Nadakpan na niadtong 2019 si Ipanag sa kaso gihapon sa ilegal nga drugas apan nakagawas human mi-avail sa plea bargain. / AYB