Usa ka ulitawo nga tig-estambayan sa Dan Junquera, Brgy. San Antonio, Siyudad sa Sugbo gidunggab human giingong nibalibad sa pagsuyop sa ilegal nga drugas alas 12 sa tungang gabii sa Lunes, Hulyo 22, 2024.
Ang biktima giila nga si Armol Labiyo, 30, taga Barangay Suba, ning siyudad samtang wala mailhi ang nidunggab kaniya.
Base sa imbestigasyon sa Parian Police Station pinaagi sa kamandoan sa ilang station commander nga si P/Maj. Marvin B. Fegarido nasayran nga ang biktima nagpatabang sa mga barangay tanod kay nagkadugo na ug nangayo og tabang human sa hitabo.
Ang biktima gidala sa Cebu City Medical Center (CCMC) ug niasoy nga siya ug ang lalaking nidunggab kaniya bag o pang nagkakita maong dapit.
Matod sa biktima nga iyang gihagad og inom ang maong lalaki apan siya ang nigasto, ug pagkahuman nila og inom, niadto siya sa dapit sa Dan Junquera diin didto siya mag-estambay.
Dason niya nga giapas siya sa maong lalaki kay makigsuyop og shabu apan nibalibad siya tungod kay wala nay kuwarta nga ikapalit.
Dugang niya, nasuko ang maong lalaki ug gidunggab siya sa buko-buko. / DVG