Nipalit og bag-ong natawo nga bata gidakop niadtong Martes sa buntag, Hulyo 22, 2025, human ang transaksyon nabulgar kay nadakpan ang mga ginikanan sa bata tungod sa ilegal nga sugal.
Ang nakapalit nga nailhan lang sa ngalan nga “Zel,” 45-anyos, minyo ug walay anak, gisikop mga alas 6:25 sa buntag sa Sitio Tabay, Barangay Guadalupe, Cebu City.
Ang pagsikop gihimo sa mga operatiba sa City Investigation and Detective Management Unit (Cidmu) sa Cebu City Police Office (CCPO).
Nagsugod ang imbestigasyon niadtong Marso 7 sa dihang gidakop ang mga ginikanan sa bata tungod sa ilegal nga sugal sa Barangay Duljo Fatima.
Nagsugod ang mga tabi-tabi dihang gi-report sa mga silingan nga gibaligya sa magtiayon ang ilang anak nga natawo sa samang bulan sa Cebu City Medical Center (CCMC).
Gikumpirma ang pagbaligya sa dihang usa sa mga anak sa magtiayon nisulti nga ang ilang inahan mopalit og bag-ong cellphone human ibaligya ang kamanghuran nga igsuon.
Kini ang nagtukmod sa Department of Social Welfare and Services ug sa CCPO sa paglusad og rescue operation.
Nasubay nila ang transaksyon ngadto sa usa ka middleman kinsa gidakop ug nitudlo kang Zel isip maoy nakapalit sa bata.
Gipakita sa closed-circuit television (CCTV) recording gikan sa CCMC nga nahitabo ang transaksyon sa gawas sa ospital.
Gibutyag sa imbestigasyon nga gibaligya ang bata sa kantidad nga P100,000.
Ang mga ginikanan giingong nakadawat og P30,000, samtang ang middleman nikuha og P57,000.
Wala pa maklaro kon kinsa ang makadawat sa nahabilin nga P13,000.
Usa ka silingan ang niingon nga dugay na silang nagduda.
“Actually, sa iyang ikapitong pagmabdos nigawas siya sa ospital nga walay dalang bata. Bisan sa wala pa, samtang naa pa siya sa ospital, duna nay tabi-tabi nga ibaligya ang bata. Mao nga natingala ko, ingon ana ba, ibaligya?” matod sa silingan nga nihangyo nga dili magpaila.
Nakadawat sab ang kapulisan og report nga gibaligya usab sa mga ginikanan ang ilang ikaunom nga anak.
Padayon pa nga gipaningkamutan sa mga imbestigador nga ma-recover ang maong bata.
Ang bag-ong natawo nga nakuha gikan kang Zel mao ang ikapitong anak sa magtiayon.
Giangkon ni Zel ang pagpalit sa bata apan walay legal nga dokumento sa pagsagop.
Ang suspek mag-atubang og kasong paglapas sa Republic Act 11862, o ang Expanded Anti-Trafficking in Persons Act of 2022.
Si Regional Trial Court Branch 20 Judge Leah Geraldez maoy nag-isyu sa arrest warrant niadtong Biyernes, Hulyo 18, ug nagtakda og piyansa nga P200,000 alang sa temporaryo niyang kagawasan.
Ang mga ginikanan sa bata nag-atubang sab og kasong trafficking nga walay piyansa.
Matod sa usa ka operatiba gikan sa Cidmu, si Zel ang No. 2 sa ilang wanted list.
Ang City Prosecutor’s Office nakakaplag og lig-on nga ebidensya sa pagpasaka sa kasong anti-trafficking batok kang Zel sa korte niadtong Mayo 23. /