Mibanaw nga tubig mibuking sa ‘kawatan’

Cebu City map.
Cebu City map.

Pagpangawat sa usa ka pawnshop napakgang human ang tubig gikan sa linya mibanaw ug ang gikatahapang kawatan nadakpan sa Natalio Bacalso Ave., Barangay Labangon, dakbayan sa Sugbo, alas 5:30 sa buntag sa Huwebes, Dis­yembre 14, 2023.

Ang suspek nga nasikop dihang wala nakagawas sa pawnshop mao si Juanito Branzuela Dilvo Jr., 25, dunay kapuyo, welder/mason sa construction, nagpuyo sa Brgy. Canduman, dakbayan sa Mandaue apan lumad nga taga Bayugan 1, Agusan Del Sur.

Gikataho nga ang suspek niagi sa luyo sa pawnshop ug sa iyang pagdukdok aron makasulod, naputol ang linya sa tubig.

Tungod sa pagbuhagay sa tubig, ang mga kawani sa tupad nga karenderiya natingala ug ilang gisubay.

Sila nagduda nga dunay nakasu’d nga tawo sa pawnshop busa sila nitaho sa kapulisan.

Samtang, nibarog nga complainant mao si Mary Ann Hesita Tuyor, 36, minyo, branch manager sa maong sanga sa Palawan Pawnshop, taga Cabahug Estancia, Barangay Ibabao, dakbayan sa Mandaue.

Si Dilvo gihulagway sa kapulisan nga sama sa sabog o ubos sa impluwensiya sa gidiling drugas tungod sa iyang nagsiga nga mga mata ug nag-usab-usab ang estorya.

‘MALING AKALA’

Nasusama sa eksina sa pelikula ang insidente samtang gituyokan sa kapulisan ang lugar.

Niilog usab sa eksina ang usa ka nagpailang inahan nga usa ka ‘Emelou’, taga Brgy. Lawaan, dakbayan sa Talisay.

Nangangkon kini nga dunay kutob o pitik sa dughan nga ang iyang 25 anyos nga anak nga wala mopauli maoy naa sa sulod sa Palawan.

Naghilak kini uban sa kapulisan, nitawag sa iyang anak, pero wala motubag busa napugos ang Special Weapons and Tactics (Swat) team sa pag-abli sa exit sa likod sa pawnshop.

Ilang nakit-an ang suspek nga diha sa nabuslot nga kisa­me nga nagtion sa armas tumong sa iyang liog.

Apan si Emelou kalit ni­ingon nga dili mao ang iyang anak dihang nakakita sa suspek nga nagluko sa kisame.

Samtang, ang suspek ni­padayag nga gusto na niyang mamatay sanglit wala na siyay pauliang balay kay wala na siyay pamilya.

Dinhi, si Police Staff Sgt. Awing Tabayag, sakop sa mobile patrol sa Labangon Police Station, uban sa mga kauban ug Swat team, nakig-negotiate sa suspek.

Nikabat sa 10 ngadto sa 15 minutos ang negusasyon. Nahitabo ang sininggitay, gi-am-aman sa kapulisan nga walay mahitabo.

Hangtod nga si Tabayag maoy nitambag sa suspek, kinsa nakahilak ug gitahan ang .38 kalibre nga armas nga puno sa mga bala.

Ang armas gipanag-iya sa guwardiya sa pawnshop apan ibilin sa sulod kon manira na.

Narekuber sa kapulisan ang cash nga P5,900, .38 kalibreng revolver ug usa ka granada.

Dugang sa suspek nga kinit-an niya ang granada apan dili siya makamao sa pagpabuto.

“Wala na daw siyay pag-asa mopahulay na daw siya, wala daw siyay ginakanan, pamilya. Akong giingnan nga ayaw, Pasko karon. Ang mga buta gani maglisod molakaw, mokatawa, gusto mabuhi,” dugang ni Tabayag.

Sa pagkakaron, ang suspek gitanggong sa kapulisan ug gikatakda nga pasakaan og kaso.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph